Kuvendi rikthen reciprocitetin ndaj Serbisë

PRISHTINE- Me shumicë votash, Kuvendi i Kosovës ka miratuar mocionin e Lëvizjes Vetëvendosje për marrjen e masave të reciprocitetit në raport me mallrat e Serbisë.

Mocioni është miratuar pas një debati rreth çështjes së masave të reciprocitetit me Serbinë që ishin vendosur më 20 korrik të këtij vitit si kundërpërgjigje ndaj bllokadës që Serbia u kishte vendosur mallrave nga Kosova, raporton REL.

Parashtruesi i kërkesës Visar Ymeri lexoi tri pikat e mocionit, të cilat më pas u miratuan me shumicën e votave të deputetëve të pranishëm në sallë.

Pika një; qeveria tí marrë masat e reciprocitetit të plotë politik, ekonomik e tregtar ndaj Serbisë. Pika dy; Ministria e Tregtisë dhe Industrisë ta nxis dhe udhëheqë bashkëpunimin me prodhuesit vendor dhe ndërmarrjet tregtare për gjetjen e zëvendësimeve për produktet e importuara nga Serbia dhe nën tre; qeveria tí  forcoj të gjitha mekanizmat shtetëror për të siguruar zbatimin e përpiktë të masave të reciprocitetit ndaj Serbisë, tha Ymeri, duke lexuar pikat e mocionit.

Ky mocion u miratua me 44 vota për, 33 ishin kundër ndërkaq 2 deputet abstenuan.

Ky ishte një prej rasteve të rralla kur opozita ia del që të miratoj një nismë, duke siguruar shumicën në kuvend. Kuvendi do të vazhdojë punimet edhe nesër.