LB ka nevojë për "marrëveshje të re"
Lëvizja për Bashkim (LB) ka mohuar të jetë ndarë nga koalicioni me Lëvizjen Vetëvendosje, në listën e së cilës i ka dy deputetë, Agim Kuletën dhe Aurora Bakallin.
Lëvizja për Bashkim, që udhëhiqet nga Avni Klinaku, po ashtu ka mohuar se është duke zhvilluar negociata me PDK’në lidhur me koalicionin e ardhshëm qeveritar.
“Sa i përket koalicionit të mundshëm qeveritar, Lëvizja për Bashkim do t’i përmbahet qëndrimit të mëhershëm se nuk do të bëjë koalicion me ata që janë përgjegjës për situatën e rëndë në të cilën ndodhet Kosova dhe qytetarët e saj", ka thënë Klinaku.
Lëvizja për Bashkim ka pasur marrëveshje me Vetëvendosjen vetëm për të garuar së basku në zgjedhje. Rrugëtimi i mëtejmë i përbashkët varet nga debati që do të kenë liderët e dy subjekteve për çështje rreth privatizimit, bisedimeve me Serbinë, çështjes së veriut, Preshevës, Bujanocit, Medvexhes, etj.
“Përtëritja apo jo e marrëveshjes do të jetë rezultat i bisedimeve në mes të Lëvizjes Vetëvendosje dhe Lëvizjes për Bashkim, bisedime këto që do të zhvillohen pas certifikimit të rezultateve”, ka thënë Klinaku, për Express.
“Duhet të bëhet një debat i mirëfilltë, një debat i pikëpamjeve, i disa qëndrimeve që akoma nuk i kemi harmonizuar dhe pastaj vendosim”, ka shtuar ai.