Lamtumirë Papa Françesku, Shqipëria në ditë zie
Shqipëria ka shpallur të shtunën ditë zie kombëtare n në nder të Atit të Shenjtë, Papa Françesku, i cili utë përcoll sot (26 prill) për në banesën e fundit.
Në shenjë dhimbjeje, respekti dhe mirënjohjeje për jetën dhe veprën e tij, në të gjitha institucionet shtetërore dhe publike flamuri kombëtar do të ulet në gjysmështizë.
Papa Françesku, i njohur për përulësinë dhe përkushtimin e tij ndaj të varfërve e të margjinalizuarve, kishte kërkuar një varrim të thjeshtë, larg praktikave tradicionale. Ai do të jetë Papa i parë pas më shumë se një shekulli që nuk do të prehet në kriptën e Vatikanit, por në Bazilikën e Shën Marisë së Madhe në Romë, pranë ikonës së tij të preferuar të Madonës.
Ceremonia e varrimit u zhvillua sot në orën 10:00 në Bazilikën e Shën Pjetrit, ku të pranishëm ishin më shumë se 250 mijë besimtarë.
Papa Françesku vdiq në moshën 88-vjeçare pasi pësoi një goditje në tru të hënën e Pashkëve, vetëm një ditë pasi u shfaq në të njëjtin shesh për t’u dhënë bekimin e tij besimtarëve. Në ditët që pasuan, rreth 250,000 vajtues u mblodhën në Vatikan për t’i bërë nderimet e tyre të fundit, ndërsa trupi i Atit të Shenjtë shtrihej brenda Bazilikës së Shën Pjetrit. Arkivoli i tij u vulos zyrtarisht të premten në mbrëmje në një rit liturgjik të udhëhequr nga Kardinali Camerlengo Kevin Farrell, kreu në detyrë i kishës.
/rtsh.al/