Lëvizja e lirë/Berisha: Në vjeshtë shqiptarët do të marrin përgjigjen më të shkëlqyer

“Kjo vjeshta do të jetë më e bukura dhe më e bardha stinë në historinë e shqiptarëve. Kështu ka deklaruar sot në një konferencë për shtyp të mbajtur nga Himara, kryeministri i vendit, Sali Berisha. “Shqiptarët do të gëzojnë vendimin e Bashkimit Evropian për të lëvizur të lirë në mbarë Evropën. Dua të theksoj se kjo përbën një arritje të pritur, ndoshta mbi 150 vjet”, theksoi gjatë kësaj konference shefi i qeverisë. Sipas tij kjo është një arritje e pritur prej shumë kohësh nga qytetarët shqiptarë, të cilët do ta marrin përgjigjen më të shkëlqyer këtë vjeshtë. “Unë gjykoj se nuk ka arritje më të madhe në rrafshin e lirisë, pas përmbysjes së diktaturës, sësa kjo. Liria e lëvizjes së qytetarëve shqiptarë nuk kufizohet më vetëm në territorin e këtij vendi, por ridimensionohet në të gjithë territorin evropian”, nënvizoi kryeministri. “Kjo do të jetë vjeshta për shqiptarët, shtoi kryeministri, duke ironizuar “vjeshtën e protestave që paralajmëroi lideri i opozitës, Edi Rama në takimin e fundit me gazetarët, në fund të korrikut. Kryeministri Berisha ndodhet prej disa ditësh me pushime në bregdetin e Jugut, në vilën qeveritare në Dhërmi, bashkë me familjen e tij.