Lezha, Berisha kërcënon: Nuk ka stabilitet pa transparencë
Berisha: Rama pranoi botërisht se ka vjedhur në Lezhë
Edhe kryeministri në detyrë, Sali Berisha reagoi pas vendimit të Partisë Socialiste për tu tërhequr nga kërkesa për përsëritje të zgjedhjeve në qarkun e Lezhës. Në një postim në rrjetin social Facebook, kryeministri Berisha tha se Rama u tërhoq pasi ka frikë nga ndëshkimi i qytetarëve të Lezhës në rast përsëritje të zgjedhjeve. Edi Rama sot (dje) pranoi botërisht se ka vjedhur 1250 vota në Lezhë. Ai papritmas tërhoqi kërkesën e paraqitur në gjykatë për përsëritjen e zgjedhjeve në qarkun e Lezhës pasi u gjet se në 14 kuti të këtij qarku kishte vjedhur me dhunë, terror dhe para droge 1250 vota dhe natyrisht me përsëritjen e zgjedhjeve, indirekt, u kërkohej ndjesë qytetarëve të Lezhës. Natyrisht, tërheqjen ai e bëri vetëm e vetëm se përsëritja e zgjedhjeve do të sillte ndëshkimin e tij shembullor nga lezhjanët për vjedhjen e votës më 23 qershor dhe do hapte rrugën për përsëritjen e tyre në Shkodër, ku janë vjedhur rreth 700 vota dhe në qarqe të tjera. Por pavarësisht nga kjo tërheqje, zgjedhjet e 23 qershorit, rezultati i tyre, mbeten fund e krye të manipuluara. Hetimi dhe transparenca e zgjedhjeve aty ku janë përdorur krimi dhe paratë e pista janë vendimtare për stabilitetin e vendit, shkruan kryeministri Berisha.
Topalli ankohet se i vodhën votat në Shkodër
Edhe Kryetarja e Kuvendit, Jozefina Topalli, ka komentuar vendimin e Partisë Socialiste për tu tërhequr nga pavlefshmëria e zgjedhjeve në qarkun e Shkodrës. Pasi u tërhoq nga Shkodra ku vetëm në një KZZ me 70 QV, 69 ishin falsifikuar, sot (dje) PS u tërhoq edhe nga kërkesa për rivotim në Lezhë dhe këtë e bën për të mirën e vendit, thotë rilindasi Rama. Kur i filluan dhimbjet për vendin këtij zotërisë? Kur ai bojkotonte, bllokonte parlamentin, dënonte vendin me mosmarrjen e statusit, ai nuk kishte dhimbje për vendin! Kur i filluan dhimbjet për vendin??!!! I filluan dhimbjet për vendin sapo filloi të dalë në shesh masakra që me forcën e parasë, të bandave e të krimit bleu, vodhi e shqyu vota e mandatet, siç u vërtetua edhe në Lezhë?!!! shkruan Topalli në Facebook