Libani drejt heqjes së dënimit me vdekje, parlamenti miraton ligjin historik
Parlamenti i Libanit ka votuar pro heqjes së dënimit me vdekje, në një vendim historik që, nëse përfundon të gjitha procedurat ligjore, do ta bënte Libanin vendin e parë në Lindjen e Mesme që e shfuqizon zyrtarisht këtë dënim.
Shumica e deputetëve në parlamentin me 128 vende mbështetën ndryshimin, ndërsa kundër tij votoi blloku parlamentar i Hezbollahut.
Projektligji do të kalojë tashmë në kabinet dhe më pas do t’i dërgohet Presidentit të Libanit, Joseph Aoun, për nënshkrim. Qeveria libaneze ka shprehur më herët mbështetjen për heqjen e dënimit kapital.
Nëse ligji hyn në fuqi, dënimi me vdekje do të zëvendësohet me burgim të përjetshëm me punë të detyruar. Megjithatë, teksti i ri ligjor nuk përcakton ende në mënyrë të detajuar se si do të zbatohet kjo masë.
Edhe pse dënimi me vdekje ka qenë pjesë e legjislacionit libanez, vendi nuk ka kryer asnjë ekzekutim që prej janarit të vitit 2004.
Ekzekutimi i një të dënuari kërkonte një dekret të firmosur nga presidenti, kryeministri dhe ministri i drejtësisë. Që prej vitit 2004, asnjë dekret i tillë nuk është miratuar, duke krijuar një moratorium de facto mbi ekzekutimet.
Megjithatë, gjykatat kanë vazhduar të japin dënime me vdekje. Organizatat e të drejtave të njeriut vlerësojnë se më shumë se 78 persona ndodhen ende në radhën e vdekjes.
Vendimi i parlamentit vjen pas dekadash përpjekjesh nga organizatat e shoqërisë civile dhe aktivistët për të hequr dënimin me vdekje nga ligji libanez.
Përpjekjet e mëparshme për shfuqizimin e dënimit me vdekje kishin dështuar. Një nismë e paraqitur në parlament në vitin 2004 nuk mori mbështetjen e nevojshme, ndërsa një tjetër propozim i Ministrisë së Drejtësisë në vitin 2008 nuk arriti të finalizohej.
/rtsh.al/