Ligji dhe Kushtetuta do prevalojnë në shqyrtimin e draftit të PS, Rama po sillet si pengmarrës

Reagon deputeti demokrat Edi Paloka: “Drafti i PS synon të sfidojë vendimet e gjykatave”

Partia Demokratike deklaron se për projektligjet e depozituara nga PS do të zbatohet ligji dhe për bazë do jetë vetëm Kushtetuta. Deputeti demokrat Edi Paloka
shprehet se vetëm ligji dhe Kushtetuta do prevalojnë në shqyrtimin e draftit me pretendimet e opozitës.
Një nga pretendimet e PS-së parashikon miratimin e një ligji të posacëm, i cili të mundësojë hapjen e kutive të votimit.
“PS kërkon të hedhë poshtë gjykatat, Gjykatën e Apelit, Kolegjin Zgjedhor, Gjykatën Kushtetuese dhe të krijojë një komision hetimor që të jetë mbi gjykatat. Ata kërkojnë një grup hetimor që të dalë mbi vendimet e gjykata, për të krijuar kështu një precedent të rrezikshëm që në të ardhmen mund të kërkojë ngritjen e një grupi tjetër hetimor, që mund të kërkojë, fjala bie, lërimin nga burgu të Aldo Bares”, u shpreh Paloka.
Deputeti i PD-së thekson se Rama është duke u sjellë si pengmarrës, përsa kohë po pretendon të verë nën shërbim të tij institucionet e pavarura kushtetuese.
Lidhur me një tjetër pretendim të opozitës, sic janë zgjedhjet e parakohshme, Paloka vëren se qeveria dhe mazhoranca janë duke punuar me kapacitet të plotë.
“Parlamenti po funksionon, ligjet dhe reformat po miratohen”, tha më tej, deputeti demokrat, Edi Paloka.