Limaj edhe 60 ditë arrest shtëpiak

Fatmir Limaj do të qëndrojë edhe 60 ditë në arrest shtëpiak. Lajmin për vazhdimin e masës së arrestit e konfirmoi për mediat kosovare avokati i tij Tahir Rrecaj.

Ai tha se nuk ka bazë ligjore për vazhdimin e masës së arrestit dhe për këtë ka ushtruar ankesë në Gjykatën Supreme.

“Tani pres vendimin e Gjykatës Supreme sepse vazhdimi i masës së arrestit shtëpiak nuk ka bazë ligjore”, tha Rrecaj për mediat.
Ndaj deputetit Limaj dhe nëntë personave tjerë, EULEX-i ka ngritur një aktakuzë që i ngarkon ata për krime lufte kundër popullatës civile dhe robërve të luftës, në fshatin Kleçkë. Seanca gjyqësore për rastin Kleçka pritet të fillojë më 11 nëntor.