Lincoln dhe vampirët
Filmi “Abraham Lincoln: Vampire Hunter” është xhiruar sipas romanit të Seth Grahame-Smith, dhe merret me hulumtimin e jetës së fshehtët të njërit prej presidentëve më të njohur amerikan, të cilin e prezanton si një nga gjuetarët më të mëdhenj të vampirëve në historinë e njerëzimit.
Në fakt, në film hamendësohet se nëna e presidentit Lincoln ishte vrarë nga vampirët, dhe se presidenti i 16’të i SHBA’ve ia dedikoi gjithë jetën e tij shkatërrimit të “thithësve të gjakut”, me një sëpatë. Madje, ai vazhdoi ta bënte këtë gjë edhe gjatë gjithë kohës sa ishte president...
Realizimi prapa të cilit qëndrojnë autorët e njohur filmik, Tim Burton (“Alisa në Botën e Çudirave”, “Charlie dhe Fabrika e Çokollatave”, “Hijet e Errëta”) si producent, dhe Timur Bekmambetov (“Roja e Natës, “Roja e Ditës”, “I Kërkuari”) si regjisor, u krijua në bazë të romanit të Grahame-Smith.
Në romanin e tij, Grahame-Smith i kombinon me shumë zhdërvjelltësi faktet ekzistuese historike me fiksionin dhe me zhanret e tjera të popullarizuara - në këtë rast me horronin e vampirëve – saqë lexuesi nuk është më në gjendje të ndajë çka është reale e çka jo.
Grahame-Smith, i cili romanin e tij e adaptoi vet për skenar filmik, njihet si autor i edhe një vepre tjetër të ngjashme: “Krenaria dhe Paragjykimet dhe Zombit”. Edhe sipas kësaj vepre të tij, e cila është pjesë e librave bestseller të gazetës ‘The New York Times’ - është xhiruar një film.
Ndryshe, në rolet kryesore në filmin “Abraham Lincoln: Gjuetar vampirësh -3D” paraqiten aktorët Benjamin Walker (si Abraham Lincoln), Dominic Cooper (si Henry Sturges), Anthony Mackie, Mary Elizabeth Winstead (si Mary Todd Lincoln), Jimmi Simpson, Robin McLeavy, Alan Tudyk dhe Rufus Sewell.