Logu i Bjeshkëve bashkon Shqipërinë, Kosovën dhe Malin e Zi

Logu i Bjeshkëve, një aktivitet kulturor me vlera dhe elemente tradicionale, ka bashkuar në kuadër të 100-vjetorit të pavarësisë së shtetit shqiptar Malin e Zi, Malësinë e Madhe dhe qytete të Kosovës.

I kthyer në event të përvitshëm, edhe kësaj here u promovuan vlera të folklorit shqiptar, të veshjeve, kulturës dhe zakoneve të malësorit.

Për orë të tëra u argëtuan qindra të pranishëm, ku mori pjesë edhe Zëvendësministri i Brendshëm i Republikës së Shqipërisë, Ferdinad Pone, si dhe deputeti i qarkut të Shkodrës Gjokë Uldedaj, duke i dhënë një mbështetje zhvillimit të turizmit të kësaj treve.

Spektakli ka kulmuar edhe me zgjedhjen e Miss Bjeshkës 2012, një event që u fitua nga 17-vjeçarja Marsela Bujaj, ku kryetar jurie ishte vetë deputeti i PD-së, Gjokë Uldedaj.

Një organizim i tillë u bë kësaj here edhe më i veçantë, duke i kushtuar një rëndësi më të madhe promovimit të vlerave kulturore dhe turistike në kuadër të 100- vjetorit të pavarësisë së Shqipërisë.