Luftime në dy anë të Tripolit

Kryengritësit libianë kanë luftuar forcat e Gadafit në dy anët e Tripolit. Luftime janë raportuar në Zavijah rreth 50 kilometra në perëndim të kryeqytetit ku rebelët po bëjnë “përpjekje të rrepta” për të marrë qytetin e naftës.

Përleshje ka pasur edhe në Zlitan, ndërsa pohimet e rebelëve për marrjen nën kontroll të këtij të fundit, janë hedhur poshtë nga zyrtarët qeveritarë.

Zëdhënësi i qeverisë, Musa Ibrahim, citohet të ketë thënë se forcat e Gadafit vazhdojnë të jenë në avantazh edhe në Zavijah, edhe në Zlitan.

Në të tjera zhvillime, kryengritësit kanë njoftuar se ish-ndihmësi i lartë i Gadafit, Abdul Salam Jallod, ka dezertuar dhe u është bashkuar rebelëve.