MOSKË – Kremlini: NATO është ”de facto” në luftë me Rusinë
MOSKË, 15 shtator /ATSH-ANSA/ – Dmitri Peskov, zëdhënësi i presidentit rus, Vladimir Putin, deklaroi se NATO është ”de facto” e përfshirë në konfliktin ruso-ukrainas për shkak të mbështetjes së vendeve perëndimore për Ukrainën, raporton TASS.
“NATO është në luftë me Rusinë. Kjo është e qartë dhe nuk kërkon prova të mëtejshme”, tha Peskov, sipas TASS.
Ambasada ruse në Bukuresht e quajti sulmin me dron të Ukrainës në Rumani një “provokim”, pas thirrjes së ambasadorit rus në Ministrinë e Jashtme rumune dje për shkak të incidentit.
Gjatë takimit, ambasadori Vladimir Lipayev e quajti protestën e Rumanisë “të pabazuar”, deklaroi ambasada ruse.
“Të gjitha faktet tregojnë besimin se ky ishte me të vërtetë një provokim i qëllimshëm nga regjimi i Kievit”, shtoi ajo.
Edhe ambasadori rus në Londër u thirr sot në Ministrinë e Jashtme me urdhër të sekretares së Jashtme britanike, Yvette Cooper për të protestuar “shkeljen e pashembullt dhe domethënëse të hapësirës ajrore polake dhe të NATO-s” që i atribuohet droneve ruse dhe “inkursionit të mëvonshëm në Rumani”.
Cooper më pas vlerësoi reagimin kolektiv të NATO-s dhe vendosmërinë e aleatëve për të qëndruar “në krah” Kievit.
“Rusia”, përfundoi deklarata, “duhet t’i japë fund luftës së paligjshme në Ukrainë”./ a.jor.