MOSKË – Ndërprerje tjetër e energjisë në rajonin rus të Belgorodit

MOSKË, 6 tetor /ATSH – DPA/ – Janë regjistruar ndërprerje të mëtejshme të energjisë në rajonin kufitar rus të Belgorodit pas një sulmi ukrainas.

Guvernatori Vyacheslav Gladkov njoftoi dje në mbrëmje në Telegram se kishte pasur dëme në infrastrukturën energjetike.

Sot në mëngjes, ai shkroi se pas punës së punonjësve të energjisë, ende kishte ndërprerje të pjesshme të energjisë në 24 lokalitete, duke prekur 5 400 banorë.

Në fund të shtatorit, pati një ndërprerje të madhe të energjisë në kryeqytetin rajonal Belgorod pas sulmeve ajrore ukrainase.

Ministria Ruse e Mbrojtjes raportoi sot  në mëngjes se 251 dronë ukrainas ishin interceptuar mbi territorin rus dhe në gadishullin e aneksuar të Krimesë gjatë natës.

Autoritetet ukrainase, nga ana tjetër, raportuan sulme ruse.

Guvernatori i rajonit Kharkiv në Ukrainën lindore, Oleh Syniehubov, shkroi në Telegram se katër persona ishin plagosur,  tre prej të cilëve kishin pësuar reagime të akute stresi.

Sipas Forcave Ajrore të Ukrainës, Rusia kishte nisur 116 dronë luftarakë gjatë natës, prej të cilëve 86 u kundërshtuan. Kishte 30 sulme në shtatë lokacione, shtuan autoritetet.

Ukraina po mbron vendin nga një pushtim i plotë rus për më shumë se tre vjet e gjysmë. Si pjesë e fushatës mbrojtëse, ajo ka sulmuar herë pas here objektiva në Rusi, përfshirë edhe rajonin e Belgorodit.

Dëmet dhe viktimat e shkaktuara nga pushtimi rus në Ukrainë janë shumë herë më të mëdha se ato në anën ruse të shkaktuara nga kundërsulmet ukrainase. /Ad.Ab./