MPJ: Të zbatohet marrëveshja për veriun e Kosovës

 Ministria e Punëve të Jashtme me anë të një reagimi shprehet se ndjek me shqetësim të veçantë situatën në veri të Kosovës dhe dënon ashpër dhunën e përsëritur të strukturave paralele dhe bandave kriminale serbe kundër trupave të KFOR-it në fshatin Rudare.

 MPJ-ja përshëndet vendosmërinë e Qeverisë së Republikës së Kosovës për ushtrimin e sovranitetit të saj dhe vendosjen e rendit e ligjit në të gjithë territorin, në bashkëpunim të ngushtë me EULEX-in dhe KFOR-in. "Është e rëndësishme të zbatohen marrëveshjet e 5 gushtit dhe 2 shtatorit të këtij viti. Gjithashtu është e rëndësishme që komuniteti ndërkombëtar të flasë me një zë për të treguar vendosmëri që të nxjerrë para drejtësisë autorët e dhunës dhe mbështetësve të tyre", thuhet në deklaratë.

"Akte të tilla dhune, vetëm pak orë pas përfundimit të raundit të radhës të dialogut Kosovë-Serbi, deklaratat destruktive nga njerëz të veshur me pushtet dhe mbajtja e mbështetja e strukturave paralele e bandave kriminale, nuk janë rruga e duhur për të ecur drejt paqes e stabilitetit në rajon, si dhe integrimit europian", thekson Ministria e Punëve të Jashtme. /Start/

                                                                                             2011-11-25 14:20