Malaj: Votimi i kryetarit të ri të bëhej pa u zvarritur nga kryesia

I deleguari i kryesisë në Kukës, Arben Malaj i bashkohet shqetësimit të deputetit Asllan Dogjani

Dogjani: Rama diktator i PS-së

Dega e Partisë Socialist në rrethin e Kukësit është përfshirë në debate të ashpra që mund të çojnë deri në përçarjen e kësaj partie. Deputeti i Kukësit, Asllan Dogjani i mbështetur nga mbi 250 anëtarë të bazës kanë kërkuar që të anulohet një vendim i kreut të PS, Edi Ram i cili ka shkaktuar kreun aktual të PS, Ylber Durakun dhe ka emëruar ish-kryetarin e mëparshëm Skënder Ahmeti. Një gjë e tillë, siç tha Dogjani, bie ndesh me demokracinë e brendshme të partisë, me statutin e saj dhe përbën një shkelje. Sipas tij, veprimet e Ramës janë frymë bajraktarizmi dhe diktature që po instalohet në Partinë Socialiste. “Në kohën që çuam këtë letër, kryetari i PS-së i ka marrë në telefon këta persona që kanë firmosur dhe i ka kërcënuar. Ky vendim duhet të rishikohet. Ne nuk kemi nevojë më për diktator, ata i kemi hequr. Nuk pranoj që në Kukës të bëhen pazare”, shtoi ai. Deputeti socialist Asllan Dogjani ditët e fundit i është ankuar edhe kryesisë së Partisë Socialiste për qëndrimet e fundit që kryesocialisti Rama ka mbajtur për strukturën e partisë në Kukës.
Ndërkohë pjesë e polemikave të ashpra është bërë dhe deputeti, njëherësh i deleguari i kryesisë në Kukës, Arben Malaj, duke deklaruar se caktimi i datës së votimit për kryetarin e PS-së së qytetit të Kukësit duhet të caktohej pa u zvarritur nga Kryesia e PS. “Ne punuam se bashku duke qartësuar listat e anëtarësisë, duke rritur aksesin për sa më shumë anëtarë dhe mbështetës të rinj në Partinë Socialiste në Kukës, duke ju dhënë akses kandidatëve në listat e votuesve sipas organizatave dhe gjatë procesit konkurruese. Përzgjedhja e kryetarëve të organizatave u bë vetëm me votim dhe kandidatura alternative. Caktimi i datës së votimit për kryetarin e PS-së së qytetit të Kukësit dhe kandidaturave konkurruese (bazuar në propozimet e organizatave), duhet të caktohej pa u zvarritur nga Kryesia e PS. Mënyra më e mirë për t’i bashkuar energjitë, është të respektojmë parimet tona kushtetuese/statutin, i cili kërkon procese të rregullta përzgjedhjeje, kërkon transparencë maksimale, përzgjedhje në çdo nivel të saj organizativ me konkurrim alternative dhe me votë të fshehtë”, shprehet ai.