Mali nën kontrollin e plotë të ushtrisë

ideri i grusht shtetit në Mali deklaroi për BBC se është në kontroll të plotë të vendit, ndërsa tha se “e mban të hapur derën” për bisedime paqeje me kryengritësit separatistë.

Sipas kapitenit Amadou Sanogo, ai u “detyrua” të rrëzonte qeverinë, për të rikthyer sigurinë në vendin e Afrikës Qendrore. Ai premtoi se do t’i dorëzojë pushtetin një qeverie të zgjedhur, menjëherë sapo të shtypë kryengritjen e tuaregëve.

Trupat pas grushtit të shtetit akuzojnë autoritetet e mëparshme se nuk i dhanë armë mjaftueshëm për të luftuar. Përpara se qeveria e zgjedhur e Bamakos të rrëzohej, tuaregët kishin arritur të vinin disa territore nën kontroll, duke zmbrapsur ushtrinë.

”Forcat e sigurisë, ato ajrore e tokësore, çdokush, çdo civil i vetëm është tashmë nën kontrollin e regjimit ushtarak, të cilin unë e drejtoj”, deklaroi Sanogo.

”Njerëzit janë rikthyer në normalitetin e tyre të jetës së përditshme. Tregjet janë hapur, transporti është duke funksionuar dhe unë besoj se po i afrohemi më pranë realizimit të atyre që i kemi premtuar çdo banori të Malit”, shtoi ai.

Për momentin, është e paqartë vendndodhja e presidentit Amadou Toumani Toure, por besohet se ai është vendosur nën mbrojtjen e një garnizoni, që i ka qëndruar besnik.

Pavarësisht se aktualisht zotëron kontroll të plotë mbi vendin, Sanogo po përballet me trysni të shtuar ndërkombëtare, për të rikthyer qeverinë demokratike në vend.