Maradona, stërvitje "alla Fidel Kastro"

Gjatë seancës stërvitore të ditës së hënë në prag të miqësores midis Argjentinës dhe Gjermanisë sot në “Allianz Arena”, trajneri i kombëtares amerikanojugore, Maradona është filmuar nga kamerat teksa tymoste me kënaqësi një puro të madhe (ndërkohë që drejtonte lojtarët në stërvitje).

Ndoshta e ka bërë për të ulur tensionin para ndeshjes (miqësore)? Ku i dihet? Por një gjë është e sigurt: kjo nuk është hera e parë që Diego Armando Maradona i habit të gjithë me veprimet e tij (brenda dhe jashtë fushës). Jo më larg se disa javë më parë, ai ngatërroi lojtarët e grumbulluar për miqësoren me Xhamajkën, duke përfshirë në listë katër lojtarë të cilët një ditë më pas do të luanin në Kupën Libertadores. Epo, ky është Maradona!...