Marrëveshje me NALIS

Pas nënshkrimit të marrëveshjes për bashkëpunim midis Bibliotekës Kombëtare dhe Universitare të Kosovës (BKUK) dhe Bibliotekës Universitare ‘Sh. Kliment Ohridski’ të Sofjes, drejtori i BKUK, Sali Bashota, dhe Dincho Krastev, drejtor ekzekutiv i Fondacionit NALIS (Fondacioni Kombëtar Akademik i Sistemit Informativ të Bibliotekave të Bullgarisë) nënshkruan një marrëveshje bashkëpunimi mes këtyre institucioneve.

Marrëveshja për bashkëpunim të vazhdueshëm do të realizohet në fusha të ndryshme të zhvillimit të bibliotekarisë dhe të shkencave të informacionit.

Qëllimi i këtij bashkëpunimi kryesisht është integrimi i burimeve bibliografike të bibliotekave të të dy shteteve, dhe shtimi i numrit të përdoruesve të bibliotekave moderne (të ofruara nga NALIS) për nxitjen e avancimit të standardeve në veprimtaritë shkencore, arsimore dhe edukative në të dy shtetet. Gjithashtu, marrëveshja përfshin edhe integrimin e regjistrimeve bibliografike dhe administrative nga katalogu elektronik i BKUK’së në katalogun e përbashkët të Fondacionit NALIS.

Marrëveshja hap një mundësi të mirë për bashkëpunim konkret e rezultativ, sidomos në aftësimin profesional, me qëllim të avancimit të dijes për bibliotekarinë dhe të njohurive në fushat e veçanta të sistemit të automatizuar bibliotekar ALPEH 500, (më konkretisht, në avancimin e teknologjisë informative).