Matura, si të përzgjidhni degën fituese në Universitet

 

zirina llambro

Llogaritje paraprake të pikëve që u duhen për të fituar universitetin. Kjo vetëm pasi të kenë marrë rezultatet e provimeve të detyruar e atyre me zgjedhje. Në përfundim të kësaj  procedure vjen hapi më i rëndësishëm: Plotësimi i formularit A2. Me anë të tij do të zgjidhen 10 degët e preferuara për universitetin, sipas një rendi zbritës. Edhe pse Ministria e Arsimit ka miratuar formatin e ri të tij, nuk ka dashur t’i nxitojë maturantët. Këshilla që specialistët e këtij dikasteri u japin është të mos nguten. “Para se të renditen preferencat duhet të bëhet një llogaritje të përafërt të pikëve, që kanë  grumbulluar nga rezultatet e mesatares së shkollës së mesme dhe provimeve të detyruara e ato me zgjedhje”, sqarojnë specialistët. Sipas tyre, hapi tjetër është gjetja në fashikullin që disponojnë  shkollat e mesme e pikëve minimale të çdo program studimi që kanë marrë fituesit e një viti më parë. Kështu nëse p.sh për degën juridik fituesi i fundit ka grumbulluar 5500 pikë, kandidatët duhet të bëjnë kujdes. Nëse pasi bën llogaritë e pikëve maturanti sheh se pikët që ai ka grumbulluar janë p.sh 3800. Duhet të zgjedhë një degë tjetër për ta listuar si një nga 10 preferencat e tij. Kjo degë fituesin e fundit për vitin 2008 duhet ta ketë me pikë të përafërta. Pra jo me diferencë të madhe.
Llogaritja e pikëve
Për llogaritjen e pikëve duhen 5 komponentët e Maturës Shtetërore. Mesatarja e shkollës se mesme(M), 2 notat e provimeve të detyrueshme (D1,D2) si dhe 2 notat e provimeve me zgjedhje (Z1, Z2). Kështu supozojmë se një nxënës i ka rezultatet e këtyre komponentëve dhe ka mbaruar profilin shoqëror në një shkollë të mesme të profilizuar. Mesataren e ka 8, D1( 8.52), D2 (8.49.). Notat e provimeve me zgjedhje janë përkatësisht Z1(8.9), Z2(8.6). Me këto rezultate në tabelën e koeficienteve, gjen se për degën ku do konkurrojë p.sh anglisht, profili shoqëror i shkollës së mesme e ka koeficientin Ksh = (1.4). Me këtë koeficient do të shumëzohet shuma e notave të provimeve me detyrim. Pra (D1+D2)X 1.4. Në tabelën e koeficienteve të lëndëve me zgjedhje gjenden koeficientet përkatës. Të dyja notat e provimeve me zgjedhje shumëzohen me këta koeficiente PSH (Z1x 1.3 dhe Z2X 1.4). Të dyja rezultatet mblidhen. Në fund shuma e marrë me dy shifra shumëzohet me 100. Pra nëse del një shifër e tillë, 55.21 nga shumëzimi me 1000 rezulton se kandidati ka 5521.0 pikë. Ai duhet të zgjedhë ato degë që fituesin e fundit vitin e shkuar e kanë pasur me pikë të përafërta. Pra në këtë mënyrë listohen degët për në shkollat e larta jo vetëm sipas preferencave, por edhe mundësisë që maturanti ka  për të fituar në këto preferenca. Pra, programi i parë do të jetë dega që preferohet më shumë dhe, e dyta ajo që shanset për të fituar janë të mëdha, nëse nuk do të fitoni në të parën. Kështu me radhë deri te preferenca 10.