Mbrojtësit i frikësohen Suarezit

Martin Skrtel i Liverpoolit beson se mbrojtësit e skuadrave kundërshtare në Premierligë përballen me “ankthe” sa herë që kanë për detyrë të mbulojnë sulmuesin Luis Suarez.

Reprezentuesi uruguaian është në formë të shkëlqyeshme dhe me dy golat kundër Wiganit në ligë u ngjit në kuotën 10, dy më tepër se rivali më i afërt. Suarez ka realizuar gjithsejtë 13 herë këtë stinor, përfshirë dy në Europa League dhe një në Capital One Cup dhe qendërmbrojtësi Skrtel beson se në formën aktuale, bashkëlojtari i tij nuk ka rival.

“Është mirë që e kemi në skuadër sepse për mua ai është sulmuesi më i mirë në Premierligë për momentin”, deklaroi Skrtel për Sky Sports News. “Jam i lumtur për të që është duke luajtur mirë dhe që po shënon gola. Shpresoj që ai të jetë në gjendje të vazhdojë kështu. Ne stërvitemi së bashku dhe e di mirë se sa vështirë është ta mbuloni, andaj jam i sigurt se çdo mbrojtës në Premierligë përballet me ankth kur ndeshet me të”, u shpreh ylli sllovak.