Merkel s’është vetëm
Europarlamentari Bernd Posselt ka konfirmuar mbështetjen e Parlamentit Europian për pavarësinë dhe integritetin territorial të Kosovës dhe i ka bërë thirrje Beogradit dhe serbëve në Veri që të pranojnë Planin e Ahtisaarit si zgjidhja e vetme për të drejtat e pakicave.
Posselt është Raportues për Kosovën i Partisë Popullore Europiane, grupi më i madh politik në Parlamentin Europian. Ai është nismëtari i rezolutës me të cilën Parlamenti Europian u ka bërë thirrje pesë shteteve të BE’së që ta njohin pavarësinë e Kosovës.
Parlamentari gjerman ka ardhur për një vizitë në Prishtinë për të marrë informacion rreth zhvillimeve të fundit në Kosovë.
Megjithëse është përfaqësues i Parlamentit Europian, ai ka pranuar të komentojë vizitën e kancelares gjermane, Angela Merkel në Beograd, gjatë së cilës ajo kërkoi nga Serbia që nëse dëshiron të marrë kandidaturën për BE gjatë këtij viti, duhet të shuajë institucionet paralele në Veri. Posselt shprehet i bindur se mesazhet e Merkelit dhe Ministrit të Jashtëm gjerman, Guido Westerwelle nuk janë vetëm të Gjermanisë.
“Qëndrimi i zonjës Merkel, qëndrimi i Westervelles, është pozicioni i shumicës dërrmuese në Parlamentin Europian dhe mendoj, edhe i Bashkimit Europian. Jo i gjitha shteteve, por i shumicës së tyre. Merkel ka thënë shumë qartë atë që të tjerët e mendojnë. Jam shumë mirënjohës për fjalët e qarta në Beograd, sepse ky është opinioni i shumicës në BE. Ajo ka folur në koordinim shumë të ngushtë me Francën. Këtë e them me sinqeritet të madh.
Unë kam marrëdhënie shumë të mira me Francën”, ka thënë ai, në një intervistë për Express.
“Zonja Merkel nuk do t’i jepte kurrë ato mesazhe aq të qarta po mos të ishte koordinuar me institucionet e Bashkimit Europian dhe Francën. Kështu që serbët duhet ta kuptojnë se ky është pozicioni i Gjermanisë por edhe qëndrimi i shumicës dërrmuese të BE’së”, ka shtuar ai.
Shkrimin e plotë mund ta lexoni në Express...