Ministri Buja uron mësimdhënësit për Ditën e Mësuesit

Ministri i Arsimit, Shkencës dhe Teknologjisë, z.Ramë Buja, me rastin e 7 Marsit - Ditës së Mësuesit uron të gjithë mësimdhënësit e Republikës së Kosovës.
Në urimin e ministrit Buja drejtuar mësimdhënësve thuhet:

Dita e Mësuesit është ndër ditët më të rëndësishme në historinë e arsimit shqip, e cila shënohet me krenari dhe dinjitet nga të gjithë ne. Mësuesit kanë merita të jashtëzakonshme në përgatitjen e gjeneratave që vunë themelet e dijes, shkencës dhe institucioneve.

Shkolla shqipe dhe mësuesi në Republikën e Kosovës nuk kanë qenë vetëm vatër e dijes, por edhe të nismave dhe lëvizjeve të mëdha historike, duke realizuar edhe krijimin e shtetit të pavarur dhe demokratik të Kosovës.

Ne u jemi shumë mirënjohës të gjithë mësimdhënësve që kontribuan në ngritjen e sistemit të arsimit dhe zhvillim të gjithëmbarshëm të shoqërisë.

Qeveria e Kosovës dhe Ministria e Arsimit, Shkencës dhe Teknologjisë do të angazhohen vazhdimisht për avancimin e pozitës së mësimdhënësve dhe respektimin institucional të tyre./Indeksonline/