Moska probleme ne furnizimin me energji

Kushtet e një dimri të acartë në Rusi po shkaktojnë probleme me furnizmin me energji elektrike të rajonit të Moskës dhe vonesa të shumta në aeroportin kryesor të vendit, Domodedovo.

Siç raportojnë sot mediat ndërkombëtare, problemet meteorologjike shkaktuan anullimin e qindra fluturimeve gjatë javës së shkuar, ndërsa më shumë se 8 mijë persona mbetën të bllokuar nëpër gejte.

Pavarësisht se dritat u rikthyen të shtunën, rreshjet e dendura të dëborës kanë shkaktuar ndërprerje në shumë qyteza dhe fshtatra përreth kryeqytetit rus.

Pas një mbyllje të shkurtër, aeroporti është duke operuar normalisht ditën e sotme, por më shumë se 5 mijë persona kanë mbetur pa energji në rajonin e Tverit, në veriperëndim të Moskës.

Kryeministri i vendit, Vladimir Putin, u shfaq nëpër televizione duke kritikuar drejtuesit lokalë, ndërsa urdhëroi drejtuesit e zonave të prekura që të rikthehen menjëherë në punë, pavarësisht pushimeve të fundvitit.