Moti i keq, bllokohet aksi Breg Lumi – Theth, 5 mjete dhe 9 persona të izoluar, Bashkia Shkodër dërgon fadromat për zhbllokimin e rrugës

Moti i keq dhe reshjet intensive kanë shkaktuar sërish probleme serioze në zonat malore. Aksi rrugor Breg Lumi – Theth është bllokuar plotësisht pas shembjes së një masivi inertesh, rreth 100 metra larg urës së fshatit Gimaj.

Sipas raportimeve të RTSH 24, si pasojë e bllokimit, 5 mjete dhe 9 persona kanë mbetur të izoluar në këtë aks.

Angazhimi i Bashkisë Shkodër dhe Emergjencave Civile

Kreu i Bashkisë Shkodër Benet Beci, nëpërmjet një postimi në rrjetet sociale, bëri të ditur se Bashkia është angazhuar menjëherë me të gjitha kapacitetet e saj në terren, duke vënë në lëvizje makineritë e rënda dhe fadromat për të filluar zhbllokimin e rrugës dhe largimin e masës së dheut dhe gurëve të rënë.

Njëkohësisht, një ekip i specializuar i emergjencave civile është nisur drejt zonës. Qëllimi kryesor është vlerësimi i situatës dhe ndërhyrja me mjete të posaçme për evakuimin dhe garantimin e sigurisë së personave të bllokuar.

Strukturat po punojnë me intensitet për të normalizuar sa më parë qarkullimin, duke iu ardhur në ndihmë qytetarëve të prekur nga kushtet e vështira atmosferike.

Autoritetet u bëjnë thirrje qytetarëve që të shmangin udhëtimet në zonat me rrezik dhe të ndjekin me kujdes njoftimet për gjendjen e rrugës.

/rtsh.al/