NATO: Dhuna ndaj KFOR-it, e papranueshme

NATO ka shprehur shqetësimin në lidhje me zhvillimet në veri të Kosovës, ndërsa ka thënë se po e vëzhgon situatën me kujdes.

“Përdorimi i dhunës kundër forcave të KFOR-it është e papranueshme”, ka thënë zëdhënësja e NATO-s, Oana Lungescu.

“U bëjmë thirrje të gjitha palëve që të tregojnë përmbajtje dhe të bashkëpunojnë plotësisht me të gjithë aktorët ndërkombëtarë në terren për të siguruar lirinë e lëvizjes”, tha ajo.

Zëdhënësja e NATO-s ka shtuar se “misioni i KFOR-it është që të kontribuojë në ruajtjen e një ambienti të sigurt, lirisë së lëvizjes dhe sigurisë në Kosovë, sipas Rezolutës 1244 të Këshillit të Sigurimit të OKB-së”.

“Ai e përmbush atë mision me kujdes dhe në mënyrë të paanshme”, ka thënë Lungescu, për të shtuar se NATO-ja e përkrah plotësisht komandantin e KFOR-it në përmbushjen e mandatit të tij.