NATO, perpetum mobile dhe xha Ganiu…
Gani Vrapi është pensionist nga Tirana. Ka punuar një jetë të tërë, nuk ka qenë spiun që të trembet nga hapja e dosjeve, por ka marrë dy medalje, një në kohë të Partisë së Punës si ‘Mjeshtër’ dhe një tjetër si ‘Pishtar demokracie’ në ‘90.
I ruan që të dyja në një sirtar të bufesë së vjetër dhe s’e ka djegur ende këtë të dytën si të tjerët.
Ka një huq të keq që i beson shumë lajmet e televizioneve dhe të gazetave, i merr me gjithë mend dhe nga kjo nuk është se ka parë ndonjë hajër, po vesi është ves dhe nuk hiqet kollaj. Më kollaj del shpirti se vesi, i thonë fjalës.
Shikon me ëndje këtë turin e Sali Berishës për NATO-n dhe i bëhet zemra mal, shkrythet i tëri.
- Bah, sa kemi ecur përpara moj grua, - i thotë së shoqes.
- Nuk e merr dot me mend. Të paktën nuk na shkoi lufta dëm.
- Lëre mor NATO-n, por shih dollapin, - i thotë e shoqja.
- E ke bosh. Vaj s’bleva, se kishte vajtur 2 800 lekë.
- Punë e madhe do bëjmë dhe pa të, po kjo punë e NATO-s është arritja me e madhe.
- Edhe orizi është bërë 1500 lekë, bleva vetëm një kile për këtë muaj dhe s’na del, - vazhdon e shoqja në të vetën dhe se është rënduar nga veshët ca.
- Lëre moj orizin, hajde dëgjo këtu. Ka bërë buxhet shtesë qeveria dhe e paskemi me dy shifra rritjen ekonomike.
- Mor po janë ngritur të gjitha me dy shifra, e di? Vetëm trangulli është ulur, - vazhdon gruaja nga aneksi.
- Bëj durim, se do ngrihen pensionet muajin tjetër, - thotë Ganiu. Më duket se ua ka vënë kusht NATO. Më dëgjo mua, këtej e tutje, dhe kur të shkosh nëpër komshinj, do flasësh vetëm për NATO-n.
- Po ku e di unë e shkreta ç’është NATO. Mbaj mend që atëherë, në zbor, këtë NATO-n e vinim në tabelë qitjeje dhe e shponim me plumba
- Po ç’të duhet ç’është NATO. Unë po të them që po na rritet pensioni prej NATO-s, ti thua çfarë është. Bukë e gjellë është për ne.
- Ëhë, pse s’thua ti që kjo NATO qenka si patatja njëherë moti, edhe bukë, edhe gjellë.
- Epo s’ta mbusha mendjen njëherë s’ta mbusha, - ia ktheu Ganiu.
I mërzitur me gruan gojëhelm, kërkon ndihmë nga lajmet e qeverisë. E hap te TVSH, me shprese se aty do t’ia mbyllte gojën gruas. Filloi lajmi i parë: Shqipëria, në NATO. “Kryeministri Berisha siguroi se reformat kanë qenë dhe do të mbeten “perpetum mobile” i qeverisë dhe se ajo do t’i përgjigjet me seriozitet çdo kërkese që Aleanca do të bëjë ndaj Shqipërisë në kuadrin e bashkëpunimit dhe anëtarësimit në të.”
- ǒtë jetë kjo “perpetum mobile?!” - tha Ganiu i shkretë me vete. Iu kujtua Dino Cicua nga Gjirokastra. Ai pat bërë një aeroplan “Perpetum Mobile” që ikte në ajër, pa patur nevojë për karburant. Por Dino i shkretë nuk kishte llogaritur fare nga do ta nxirrte avionin që e ndërtoi fshehurazi brenda shtëpisë. Në fund, prishi shtëpinë dhe avioni nuk fluturoi.
- Kush t’ia ketë dhënë këtë mendje, tha me vete, se si budallallëk qenka. Mos ka ndonjë këshilltar nga Gjirokastra, se s’ka mundësi.
Mori telefonin dhe i telefonoi PD. Flamuri, që përgjigjet për partinë, i ka dhënë celularin personal për çdo hall që të ketë, kur nuk kupton propagandën.
- Më fal, zoti Flamur, - i tha Ganiu, - se nuk e kuptova dot atë punën e reformave “perpetum mobile” që tha doktori. Ka ndonjë këshilltar nga Gjirokastra ai, se s’ka mundësi t’ia ketë thënë njeri.
- Ka, ka, - tha Flamuri, - po i ka kot ata. Ai burri vetëm mua më pyet për çdo gjë.
- Jo, ty e di që të ka, - i tha Ganiu, - por kam frikë se mos e ka këshilluar ndonjë gjirokastrit, se perpetum mobile vetëm një nga Gjirokastra ka bërë.
- Ëhë, - tha Flamuri i hutuar. - Po mo, po ka Ylli Asllanin, mund t’ia ketë thënë ai, se ata rrjedhin pas 40 vjetësh. Por nuk e pyet shumë ai burri. Dhe në këtë rast mund ta ketë dëgjuar për t’i bërë qejfin.
-Mirë, mirë, - ia ktheu Ganiu, - po si t’ia shpjegoj gruas tani, se s’beson asgjë shtriga.
- Epo ç’të them unë, - tha Flamuri. - I kam thënë atij burrit mos të pyesë njeri tjetër, po s’më dëgjon.