Emrat për deputetë, nis përplasja në PS

Nisin ethet e zgjedhjeve të ardhshme parlamentare në partinë më të madhe të opozitës, PS. Sfida e Ramës mbetet lista e kandidatëve për deputetë, reagimet për të cilën kanë nisur që tani, rreth një vit para zgjedhjeve. Deputetët aktualë të PS, shumica e të cilëve pritet të mos jenë pjesë e listës së Ramës, duket se kanë nisur presionet ndaj kryetarit, ende të pabëra publike, por, gjithsesi, reaksioni ka nisur. Burime pranë PS thanë dje se, deputetët aktualë të PS, të cilët rrezikohen të mos jenë pjesë e listës si kandidatë për zgjedhjet e ardhshme parlamentare, kanë nisur presionet ndaj kryetarit Rama, duke e sulmuar atë për drejtimin e partisë në një opozitë të dobët. Një tjetër pretekst, me të cilin deputetët që shumë shpejt do të braktisen prej Ramës, do të jetë edhe marrëdhënia e PS me aleatët dhe kritikat për prishjen e marrëveshjes me LSI. Reagimi i tyre mbështet pikërisht te përvoja e zgjedhjeve të vitit 2005, kur PS dhe LSI dolën të ndara dhe në opozitë të fortë ndaj njëra-tjetrës, gjë e cila soli humbjen e PS në këto zgjedhje.

Ndërsa deputeti dhe nënkryetari i grupit parlamentar socialist, Erion Braçe, duket se i përket këtij qëndrimi, pavarësisht faktit, nëse ai përfshihet në listën e kandidatëve për deputetë të PS në zgjedhjet e ardhshme parlamentare. Në mbledhjen e fundit të kryesisë së PS ka qenë Braçe që i është kundërvënë Ramës, ndërsa pas tij duket se qëndron një grup deputetësh të PS, të cilët gjithashtu kanë të njëjtin qëndrim me Braçen lidhur me mënyrën e të bërit opozitë, por shkaku nuk duket se është pikërisht ky. Shkaku mbetet frika e tyre për mospërfshirje në listën e kandidatëve për deputetë.

Sidoqoftë, Partia Socialiste ka nisur kështu organizimin për zgjedhjet e ardhshme parlamentare. Në mbledhjen e ardhshme të Asamblesë Kombëtare të PS, e cila do të zhvillohet këtë fundjavë në qytetin e Fierit, pritet të diskutohet projekti i riorganizimit të partisë dhe të gjitha procedurat që do të ndiqen për përzgjedhjen e kandidatëve për deputetë të PS në zgjedhjet e ardhshme parlamentare. Të gjitha strukturat drejtuese të PS do të nisin punën e pandërprerë në bazën e partisë për të ristrukturuar të gjitha organizatat socialiste për të qenë të gatshme për zgjedhjet e ardhshme parlamentare.