Dekretet testojnë raportet e reja të presidentit me PS e PD

Një zyrtar i lartë i Partisë Socialiste, Fatmir Xhafa, shprehu dje dyshimet e tij për së paku gjysmën e dekreteve të presidentit Topi mbi anëtarët e Gjykatës Kushtetuese, duke risjellë dyshimet për miratimin e tyre, tashmë edhe për shkak të Partisë Socialiste. Gjashtë dekretet, për të cilat ende nuk ka komente nga PD, pritet të kalojnë së shpejti në Kuvend, ku mund të organizohet, sipas praktikave të reja të instaluara, dhe një komision dëgjimor për biografinë e tyre. Kjo praktikë e re, si dhe deklarata e zyrtarit më të rëndësishëm të opozitës që merret me çështjet ligjore, në të vërtetë po krijojnë një klimë të re për Presidentin e Republikës, që ka të bëjë me thirrjen që ai të jetë i dëgjueshëm ndaj konsultave të dy forcave të mëdha. Herën e parë dekretet u rrëzuan, pasi PD ishte e zemëruar, pse nuk u pyet. Herën e dytë ajo nuk u pyet sërish, por nuk reagoi. Në vend të saj reagoi Partia Socialiste dhe rezultati mund të jetë i njëjtë. Kjo taktikë, ndoshta jo aq mirë e bashkërenduar formalisht, por me një intuitë perfekte politike, në të vërtetë zhvlerëson shumë fuqinë e dekreteve të presidentit dhe e detyron këtë të fundit që përfundimisht, për çdo rast të tillë, të ulet me Ramën dhe Berishën dhe ta ndajnë tortën së bashku. Kështu, është e qartë se socialistëve nuk iu pëlqejnë së paku tre vetë, por pa thënë emra. Kjo do të thotë se ata duan tre emra në listë dhe së bashku me tre emra që duhet të jenë të PD, ata qetësohen dhe situata normalizohet. Pra, në njëfarë mënyre, me mjete të tjera jo të dhunshme, presidentit po i jepet i njëjti mesazh, që të mos veprojë jashtë tutelës së dyshes Berisha-Rama. Ose minimumi ta ndajë listën me të dy ata në mënyrë të barabartë.

Nga ana tjetër, ky zhvillim i ri nga ana e opozitës legjitimon shumë vendimin e mëparshëm të PD për rrëzimin e dekreteve, pasi e kthen atë në një rrugë normale, kur një force politike të pakonsultuar nuk i pëlqejnë emrat. Përpjekja e presidentit për një konsultë formale me faktorë jopolitikë për emrat në të vërtetë rezulton joproduktive politikisht, pasi fjalën e fundit për emrat që zgjidhen e ka politika. Shantazhi i qartë i djeshëm i zotit Xhafa dëshmon se kemi të bëjmë me një instalim të ri rregullash në politikën shqiptare të dy forcave kryesore në raport me presidentin. Pas ndryshimeve kushtetuese, ata e shikojnë realisht presidentin si noter të akteve të tyre ligjore dhe jo si prokurues të tyre.

Nuk është e sigurt se si do të reagojë zyrtarisht PD tashmë, por, sido që ajo të reagojë, në kushtet e një votimi të fshehtë, tashmë është e paqartë se kush do të votojë pro dhe kundër, se s’do të bëhet më luftë në bllok, por luftë emër për emër. E vetmja gjë e qartë do të ishte, nëse dy forcat kryesore, PD dhe PS, do të kishin ndarë vetë tortën dhe do t’i jepnin thikën presidentit ta priste. Tashmë që presidenti e ka blerë vetë tortën, vetë thikën dhe vetë pirunin, rrezikon t’i mbetet pa e provuar, pasi ata që vendosin në finale, thjesht janë të mërzitur që nuk janë pyetur realisht.

Kjo histori prodhon po ashtu dhe një standard të ri të mënyrës së formimit të institucioneve të drejtësisë, kur vjen fjala që ato do të mandatohen nga Kuvendi. Është e qartë se dy të mëdhenjtë duan realisht të pyeten. Ata nuk e kanë pranuar konsultën formale të presidentit dhe as duan t’ia dinë për cilësinë e lartë apo të ulët të kandidatëve. Ata nuk pranojnë të ngrenë dorën për njerëz që nuk ua dinë për nder atyre. Dhe ky është produkti më i ri që kemi nga reforma kushtetuese. Nuk di në është mirë apo keq, por e sigurt është që po ndryshon politikën dhe shumicën presidenciale në Kuvend.