Ndahen Çmimet “Atë Gjergj Fishta”, fituesit janë Gjon Marku, Primo Shllaku dhe Vlora Ademi

Gjon Marku në gjininë e studimeve, Primo Shllaku në atë të romanit dhe Vlora Ademi në vëllimin poetik janë shpallur tre fituesit e çmimeve “At Gjergj Fishta” në letërsi për vitin 2023.

Ceremonia e ndarjes së çmimeve u mbajt në Lezhë, në nder të 152-vjetorit të lindjes së kolosit të letërsisë shqipe.

Pjesë e konkursit mbarëkombëtar ishin edhe 43 vëllime të shkrimtarëve të ndryshëm të vlerësuar nga juria, e cila përbëhej nga Mark Simoni, Diana Çuli dhe Alfred Çapaliku.

“Ecuria e këtij konkursi gjithnjë po vjen duke u rritur dhe ky është lajm jashtëzakonisht i mirë për adhuruesit e Fishtës, për gjithë njerëzit e letrave në Shqipëri,” tha Frano Kulli, botues i veprave të “At Gjergj Fishtës”.

“Gjithsecili ndër ne, kurdo kur i jepet mundësia, do të duhet të bëjmë detyrën tonë për ta lartësuar figurën e Gjergj Fishtës dhe për t’ua trashëguar brezave,” tha Ulsi Manja, ministër i Drejtësisë.

“Ky është respekti më i madh që i bëhet Atë Gjergj Fishtës, një njeriu që nga pikëpamja letrare, por edhe e kontributit letrar, është i jashtëzakonshëm,” u shpreh Pjerin Ndreu, kryetar i Bashkisë Lezhë.

Në këtë edicion, ndër të tjera u ndanë edhe çmimet e karrierës dhe post-mortem, ku u vlerësuan Sabri Hamiti, Agim Isaku, Danjel Gazulli dhe Ndue Gaspri.

Ky aktivitet, i cili është kthyer tashmë në një traditë të përvitshme, u organizua nga Bashkia Lezhë, me mbështetjen e Ministrisë së Kulturës.

/rtsh.al/