Ndërprerja, studentët u rikthehen auditorëve

15/01/2010  Shkollat e mesme në një tjetër afat
Studentët e Universitetit “Luigj Gurakuqi” në qytetin e Shkodrës do të rinisin mësimin pas ndërprerjes disaditore për shkak të përmbytjes që preku këtë qytet. Ministria e Arsimit ka njoftuar gjatë ditës së djeshme çeljen e procesit mësimor në këtë institucion duke filluar nga dita e sotme, pasi është konfirmuar zyrtarisht se ambientet janë rikthyer në përdorim të studentëve për zhvillimin e procesit mësimor sipas programeve përkatëse. “Ndërmarrja e Trajtimit të Studentëve prej ditës së sotme ka gati të gjitha mjediset e qendrës studentore, për akomodimin e studentëve në konviktin e Universitetit ‘Luigj Gurakuqi’, Shkodër”, - është deklaruar nga Ministria e Arsimit. Nga ky rregull do të përjashtohen shkollat e mesme, në të cilat mësimi do të nisë në një tjetër afat. Shkak për këtë shtyrje bëhet fakti që në konviktet e shkollave të mesme profesionale të Shkodrës janë të akomoduar ende me dhjetëra banorë të zonave të përmbytura. Përkundrejt kësaj situate Ministria e Arsimit ka përcaktuar që nisja e procesit mësimor për këto shkolla do të shtyhet në një afati tjetër, kur gjendja të jetë normalizuar dhe banorët të jenë strehuar në ambiente të tjera jashtë konvikteve.