Ndërtimet pa leje/ Salianji: Qeveria e ka mbyllur gojën, kullat ngrihen me urdhër të Ramës
Deputeti i PD Ervin Salianji ka denoncuar ndërtimet pa leje në qendër të Tiranës. Në një deklaratë për mediat nga Sheshi Skënderbej ai bëri me dije se më 13 shtator u kishte drejtuar një letër qeverisë që të kërkonte infomacion më të thelluar për ndërtimet pa leje.
Ndërsa ende nuk ka marrë asnjë përgjigje rreth çështjes në fjalë, Salianji shprehet se qeveria nuk e ka një përgjigje sepse është tërësisht e kapur dhe e pafuqishme pasi gjithçka është në dorë të kryeministrit Rama.
Ai shtoi se do të vijojnë denoncimet e vendeve të tjera se ku, sipas deputetit, qeveria favorizon duke vendosur dyfytyrësinë dhe jo barazinë para ligjit.
“I jam drejtuar qeverisë për informacion se sa është numri i subjekteve të paligjshme që kanë shkelur lejen e ndërtimit. Numri i rasteve të ndërtimeve të paligjshme, a janë marrë administrative apo a janë kallëzuar penalisht zyrtarë?
Sot pas më shumë se 2 javësh qeveria ende nuk e ka një përgjigje sepse është tërësisht e kapur dhe e pafuqishme dhe ligji nuk është i barabartë për të gjithë.
Qindra qytetarë janë arrestuar për ndërtime në shtëpitë e tyre. Qeveria ndjek penalisht çdo qytetar të pamundur në këtë vend, nga ana tjetër këtu shikojeni pak përballë institucioneve më të rëndësishme, ku kalojnë ministra, drejtuesit e policisë së Shtetit, kjo është leja e miratuar nga Rama KKT 26 kate. Ky ndërtim shikoni sa ka shkuar.
A ka mundësi që ky ndërtim në mes të Tiranës, një grataçelë të bëhet pa bekimin e qeverisë. Sot po e pyes zyrtarisht a e ka çuar dhe referuar në prokurori IKMT dhe policia e Shtetit? Do të jem bashkë me ju në ndërtesa të tjera në Tiranë, në përbindësha betoni që kanë marrë dhe shtetin në kontroll duke ndërtuar në mënyrë të paligjshme. Sot ndërtime si ky duhet të kishin miliona euro gjobë. Nga ana tjetër ndërtuesi apo pronari i këtij duhet të ishte para përgjegjësisë penale.
Qeveria e ka mbyllur gojën sepse nuk ka asnjë përgjigje. Do vazhdojmë të denoncojmë në vende të tjera se ku qeveria favorizon duke vendosur dyfytyrësinë dhe jo barazinë para ligjit”.- tha Salianji.
/rtsh.al/