Ndryshimet ligjore, forcim i sistemit kombëtar të mbrojtjes civile

TIRANË, 8 tetor/ATSH/ Forcimi i sistemit kombëtar të mbrojtjes civile dhe rritja e kapaciteteve për përballimin e fatkeqësive janë në fokus të projektligjit të ri për disa shtesa dhe ndryshime në ligjin “Për mbrojtjen civile”.

Projektligji i hedhur për konsultim publik nga Ministria e Mbrojtjes synon përmirësimin e mekanizmave të mbrojtjes civile në Shqipëri, me qëllim zvogëlimin e riskut nga fatkeqësitë dhe garantimin e mbrojtjes së jetës së qytetarëve, gjësë së gjallë, pronës, trashëgimisë kulturore dhe mjedisit.

Sipas relacionit shoqërues, ndryshimet ligjore konsiderohen të nevojshme për rritjen e efikasitetit dhe konsolidimin e performancës së sistemit kombëtar të mbrojtjes civile, si dhe për forcimin e kapaciteteve institucionale në menaxhimin e situatave të fatkeqësive.

Një tjetër objektiv i projektligjit është përmirësimi i performancës së strukturave përgjegjëse në kuadër të përmbushjes së detyrimeve që rrjedhin nga anëtarësimi i Shqipërisë në Mekanizmin e Mbrojtjes Civile të Bashkimit Evropian (UCPM).

Pr/ligji synon adresimin e problematikave të evidentuara gjatë zbatimit të deritanishëm të ligjit, përfshirë koordinimin institucional, menaxhimin e fatkeqësive dhe përballimin e emergjencave civile.

Ndryshimet parashikojnë rregullimin e detyrave të organeve kolegjiale të sistemit kombëtar të mbrojtjes civile, si dhe përmirësimin e koordinimit ndërmjet strukturave të parashikuara në ligj.

Një tjetër aspekt lidhet me përfshirjen e strukturave operacionale në përballimin e emergjencave brenda dhe jashtë vendit, si dhe përcaktimin e procedurave për angazhimin e tyre në misionet e Mekanizmit të Mbrojtjes Civile të Bashkimit Evropian (UCPM).

Ndryshimet synojnë edhe rregullimin e statusit të shërbimit të vullnetarëve të mbrojtjes civile, si dhe saktësimin e detyrimeve për trajnimin dhe formimin profesional të të gjitha subjekteve të ligjit.

Projektakti trajton gjithashtu përfshirjen e shtetit në ndihmën ndaj subjekteve të dëmtuara nga fatkeqësitë, si dhe rolin dhe funksionet e Agjencisë Kombëtare të Mbrojtjes Civile (AKMC) në sistemin kombëtar të mbrojtjes civile.

Ndër përparësitë e tij përfshihet Sistemi Kombëtar i Menaxhimit të Emergjencave Civile, riformulimi i përbërjes dhe detyrave të Komitetit të Mbrojtjes Civile, si dhe saktësimi i rolit të AKMC-së në mbështetje të KMC-së dhe KNEC-së.

Projektakti synon përmirësimin e kuadrit rregullator për marrëdhëniet dhe detyrimet e institucioneve dhe strukturave qendrore e vendore të sistemit kombëtar të mbrojtjes civile.

Ndër ndryshimet e propozuara përfshihet edhe ridimensionimi i përfshirjes shtetërore në përballimin e dëmeve ekonomike të shkaktuara nga fatkeqësitë, rregullimi i shërbimit të vullnetarëve dhe saktësimi i detyrave për trajnimin dhe formimin profesional në fushën e mbrojtjes civile.

Ndryshimet e propozuara synojnë kështu konsolidimin e sistemit të mbrojtjes civile dhe rritjen e aftësisë së strukturave përgjegjëse për të menaxhuar fatkeqësitë dhe për të zvogëluar pasojat e tyre.

/m.m/j.p/