Në Zagreb për ta ftuar Dinamon
Kryetari i Federatës së Futbollit të Kosovës (FFK), Fadil Vokrri, është ftuar nga zyrtarët e Dinamos së Zagrebit për ta përcjellë derbin kroat që kjo skuadër do ta zhvillojë të shtunën mbrëma ndaj rivalit nga Spliti, Hajduku.
Vokrri nuk do të jetë i vetëm në këtë ndeshje, pasi do të jetë i shoqëruar edhe nga selektori i përfaqësueses së Kosovës, Albert Bunjaki. “Kjo vizitë e imja në Kroaci është në vazhdën e përpjekjeve të ndërkombëtarizimit të futbollit tonë”, tha Vokrri për Express.
Udhëheqësit e futbollit kosovar kanë marrëdhënie të mira me zyrtarët e Dinamos, ku luajnë edhe dy futbollistët kosovarë, Fatos Beqiraj dhe Arian Ademi, derisa këtë vizitë pritet ta shfrytëzojnë të ftojë gjigantin kroat në Kosovës për ta zhvilluar miqësoren e shumëpritur.
Në muajin e kaluar Dinamo e Zagrebit në çastet e fundit e pati anuluar udhëtimin drejt Prishtinës, për ta zhvilluar një miqësore me përfaqësuesen e Kosovës për nder të ditës së pavarësisë të vendit tonë, pasi stadiumi i Prishtinës ishte duke u riparuar.
“Siç dihet, ndeshja qe anuluar shkaku i disa problemeve teknike dhe kroatët patën thënë se në Kosovë do të vijnë me një datë tjetër. Unë do të bisedoj me zyrtarët e Dinamos rreth gjetjes së një date të përshtatshme për të dyja palët për ta luajtur atë miqësore”, u shpreh Vokrri.
Përveç drejtuesve të Dinamos së Zagrebit, Vokrri e Bunjaki pritet të takohen edhe me zyrtarë tjerë të lartë të Federatës së Futbollit të Kroacisë.