Në mbledhjen e sotme të Këshillit të Ministrave u miratuan dy vendime të rëndësishëm që synojnë plotësimin e kuadrit ligjor të hërbimit të Gjendjes Civile. Kështu, u miratua vendimi "

Në mbledhjen e sotme të Këshillit të Ministrave u miratuan dy vendime të rëndësishëm që synojnë plotësimin e kuadrit ligjor të hërbimit të Gjendjes Civile. Kështu, u miratua vendimi "Për mënyrën e kodimit dhe strukturën e numrit të identitetit të shtetasve".

Ky vendim plotëson kuadrin ligjor të Shërbimit të Gjendjes Civile dhe krijon mundësitë praktike për fillimin e proçesit të lëshimit të numrit të identitetit të shtetasve, i cili është një numër zyrtar, personal, i papërsëritshëm.

Numri i identitetit është një përbërës i ri i gjendjes civile, i cili do të jetë elementi kryesor i identifikimit të shtetasve. Në vendim përcaktohet teknikisht mënyra e kodimit dhe struktura e numrit të identitetit.

Proçesi i lëshimit të numrit të identitetit do të realizohet fillimisht me dhënien e këtij numri për foshnjat e lindura nga data 1 janar 2004. Për personat e tjerë ky numër do të lëshohet pas kompjuterizimit të zyrave të gjendjes civile dhe krijimit të Regjistrit Kombëtar të Gjendjes Civile.

Numri i identitetit, si elementi kryesor i identifikimit, do të jetë kyçi lidhës i bankave të ndryshme të të dhënave që përdorin si të dhëna bazë ato të gjendjes civile. Dhënia e tij do t'i hapë rrugë edhe lëshimit të dokumentave shqiptarë të identitetit të standarteve europiane, si dhe do të lehtësojë punën e një sërë organesh dhe institucionesh shtetërore dhe private, si Sigurimet Shoqërore, Komisioni Qendror i Zgjedhjeve, Sigurimet Shëndetësore, Organet Tatimore, Shërbimi i Gjendjes Civile, organet e drejtësisë, rendit, prokurorisë, mbrojtjes, arsimit, të regjistrimit të pasurive etj.

U miratua vendimi "Për formën, mënyrën e mbajtjes, elementët përbërës dhe afatin e përdorimit të dokumentave, nga zyrat e gjendjes civile".

Vendimi propozon modele të reja të dokumentave të gjendjes civile, duke bërë disa ndryshime në modelet e mëparshme, ndonëse jo thelbësore. Këto ndryshime kanë të bëjnë me futjen e disa rubrikave të reja dhe me përshtatjen e emërtimeve të disa rubrikave ekzistuese.

Karakteristikë dalluese e modeleve të propozuara të dokumentave të gjendjes civile është futja e numrit të identitetit dhe e 8 modeleve të reja, ndër të cilat 3 çertifikatat për përdorim për jashtë shtetit, të shkruara në gjashtë gjuhë të huaja.

Gjithashtu shtohen disa dokumenta të cilat nuk ekzistonin më parë, si Regjistri Themeltar i Gjendjes Civile i Shtetasve të Huaj dhe Pa Shtetësi, Me Banim të Përhershëm në Shqipëri, Libri i Proçesverbaleve për Bashkim dhe Ndarje Familjare, çertifikatat në gjuhë të huaj, Shpallja e Martesës dhe Vendimi për Pezullimin e Proçedurave të Lidhjes së Martesës, Refuzimi për Lidhjen e Martesës.

Në ndryshim nga vitet e tjera përfaqësitë diplomatike dhe konsullore shqiptare do të pajisen me Librat e Akteve të Lindjes, Martesave dhe Vdekjeve.

Miratimi i këtij vendimi do të përmirësojë punën e degëve të gjendjes civile në qarqe, zyrave të gjednjes civile në bashki e komuna, si dhe në shërbimin e gjendjes civile në përfaqësitë diplomatike dhe konsullore shqiptare, duke shënuar në këtë mënyrë edhe një hap përpara në përafrimin me dokumentacionin analog të vendeve europiane.