Në nëntor mund të vendoset për Malin e Zi drejt BE-së

Nëntori shihet si periudha indikative për të vendosur nëse Mali i Zi, është apo jo një vend kandidat për anëtarësim në Bashkimin Europian. Procesi i zgjerimit të Bashkimit Europian, në Ballkanin Perëndimor, është një prioritet dhe një angazhim i rëndësishëm i presidencës spanjolle. Kështu ka bërë të ditur sekretari spanjoll i shtetit për Bashkimin Europian, Diego Lopez Garrido. Ndërkaq BE ka konfirmuar përparimin ose progresin e Malit të Zi në fushën politike, sidomos me zgjedhjet e saj të fundit, mbajtur në mars 2009, dhe progresin në çështjen e trajtimit të minoriteteve. Gjithashtu është vlerësuar pozitivisht roli i Malit të Zi në mbështetje të bashkëpunimit rajonal dhe stabilizimit, si dhe hapat drejt përmirësimit të marrëdhënieve ndërmjet Bashkimit Europian dhe Ballkanit. Një çështje e tillë, është bërë e mundshme nga takimi më i fundit BE-Ballkani Perëndimor në Sarajevë.
Gjatë takimit, BE këmbënguli se Mali i Zi duhet të vazhdojë të bëjë disa përmirësime në gjendjen e komunitetit rom dhe në luftën kundër krimit të organizuar dhe korrupsionit.
Politika e BE-së për Ballkanin Perëndimor, e cila ishte vendosur në axhendën e Selanikut, përfshin liberalizimin e vizave si një hap drejt pranimit në BE. Negociatat për liberalizimin e vizave filluan në 2008 dhe përcaktojnë masa të tilla si futja e pasaportave biometrike. Që nga janari, qytetarët e Serbisë, Malit të Zi dhe Maqedonisë nuk kanë më nevojë për një vizë për të hyrë në BE, duke ndjekur rrugën drejt politikës se integrimit në BE.