Në pranga trafikanti i qenieve njerëzore

I shantazhonte dhe i kërcënonte femrat që të kryenin marrëdhënie seksuale për përfitime personale. I dyshuari M. S sot ka përfunduar në pranga nga ana e policisë në Prizren.

Arrestimin e ka konfirmuar Zyra për informim e Policisë së Kosovës.

Fillimisht, njësia për hetimin e trafikimit me qenie njerëzore-Prizren, kohë më parë ka pranuar një informacion lidhur me një person për të cilin dyshohej se i njëjti merrej me veprimtari kriminale konkretisht trafikim me qenie njerëzore.

“Njësia në fjalë me të marrë informatën ka ndërmarrë të gjitha veprimet e duhura policore dhe sot (21.05.2013), ka arrestuar personin e dyshuar, M. S, lindur më 1989, nën dyshimin e bazuar se i njëjti ka kryer veprën penale “Trafikim me njerëz”, si dhe ka identifikuar dy viktima të trafikimit”, thuhet në njoftimin e policisë.

Bazuar në hetimet fillestare policore, i dyshuari tashmë i arrestuar, i detyronte viktimat duke i kërcënuar dhe shantazhuar, që të kryenin marrëdhënie seksuale me persona të ndryshëm me qëllim të përfitimit material.

Lidhur më këtë rast janë gjetur prova dhe dëshmi të nevojshme hetimore, se i dyshuari ka kryer veprën penale trafikim me njerëz.

Të gjitha veprimet policore lidhur me këtë rast janë kryer nën autorizimin e prokurorit të prokurorisë themelore- Gjakovë dhe të dyshuarit i është caktuar masa e paraburgimit për të vazhduar me procedura të mëtutjeshme. /Indeksonline/