Në vendet e Lindjes, OBSH: Të sëmurët mendorë nuk trajtohen

Organizata Botërore e Shëndetësisë thotë se miliona njerëz në vendet në zhvillim që vuajnë nga sëmundje mendore nuk marrin trajtim për këto sëmundje. Agjencia e Kombeve të Bashkuara thotë në një raport të publikuar sot, se tre në çdo katër persona të sëmurë në vendet e varfra nuk marrin ndihmë. Ky raport është baza e një programi të OKB-së, që synon të rrisë ndërgjegjësimin e njerëzve dhe të bindë qeveritë e ndryshme që të fillojnë të përmirësojnë programet ekzistuese të shëndetit mendor. Programi ka në qendër të tij 8 çrregullime mendore, si skizofrenia, dementia apo epilepsia dhe synon mes të tjerash parandalimin e vetëvrasjeve. Drejtori i Organizatës Botërore të Shëndetësisë për shëndetin mendor, Benedeto Saraçeno, tha se organizata e tij synon që deri në vitin 2015 të sigurojë trajtim mjekësor për 40 milionë njerëz, ose 20 për qind të personave që vuajnë nga sëmundje mendore në botë.