Netanyahu dhe Barak me qëndrime të kundërta për Iranin

Kryeministri i Izraelit, Benjamin Netanyahu, i cili po qëndron për vizitë në Paris, tha se do të kërkojë nga liderët francezë që të ndihmojnë në shtrëngimin e sanksioneve ndaj Iranit, për shkak të programit të tij bërthamor.

Takimi i Netanyahut me presidentin francez, Francois Hollande, do të jetë i pari që kur Hollande u zgjodh në krye të vendit pesë muaj më parë.

Izraeli dhe vendet perëndimore dyshojnë se Irani është duke u përpjekur që të krijojë armë bërthamore, gjë që mohohet nga Teherani.

Ministri i Mbrojtjes i Izraelit, Ehud Barak tha se Irani është tërhequr nga përpjekjet për të ndërtuar një armë bërthamore, për të shmangur një përballje të mundshme ushtarake për momentin.

Në një intervistë për gazetën britanike “Daily Telegraph”, Barak tha se një krizë e menjëhershme është shmangur gjatë verës, kur Irani kishte zgjedhur përdorimin e më shumë se 1/3 e uraniumit mesatar të pasuruar, për qëllime civile.

Kjo gjë, sipas Barak, e ka shtyrë afatin e mundësive të Iranit për tu përpjekur për të ndërtuar një bombë bërthamore.

Sipas Barak, ky veprim i Iranit vetëm e ka shtyrë atë që ai e ka quajtur “moment i së vërtetës” nga “tetë në dhjetë muaj” dhe tha se Izraeli dhe aleatët e tij mund të përballen sërish me Iranin gjatë verës së vitit 2013.