Ngrin Shqipëria, ushqime me helikopterë në zonat e izoluara
Acari dhe dëbora po mbajnë të izoluar prej mëse një jave rrugë dhe komuna të vendit, duke krijuar nevojën e ngritjes së shtabit të emergjencave në zonat juglindore dhe veriore.
Drejtori i Shëndeti Publik në kryeqytet, Gazemend Bejtja ka kërkuar veprimin urgjent për zonat e bllokuara përmes ngritjes së shtabeve operacionale të menaxhimit të fatkeqësive.
Ndërkaq drejtori i Rezervave Materiale të Shtetit, Hysen Arapi tha se drejt veriut janë nisur ndihma ushqimore nga toka dhe ajri. Sipas Arapit drejt Pukës janë nisur 2 kamionë me 300 pako me ushqime. Po ashtu 50 pako ushqime janë nisur me helikopterë drejt komunave Trebisht dhe Klenjë të Dibrës.
Ndërkaq në Peshkopi situata paraqitet e njëjtë, erëra të forta dhe dëbora mbajnë të izoluar akset Qafë Buall-Peshkopi, Qafë e Buallit-Burrel- Krastë, Bulqizë-Fushë Bulqizë në vendin e quajtur Vajkal. Komunat Ostren, Martanesh, Trebisht dhe Zerqan janë të izlouara dhe po vuajnë edhe mungesën e energjisë elektrike.
Ndërkaq në Pukë prej mëse një jave janë të bllokura të gjitha akset rurale dhe ato nacionale Fushë Arrëz-Kukës dhe Fushë Arrëz-Bajram Curri. Ndërsa mësohet se akset Pukë-Shkodër, Pukë-Fushë Arrëz, Hadroj-Mirditë kalohen vetëm me zinxhirë.
Po ashtu bëhet me dije se 247 familje në Fushë Bulqizë, Iballë, Fierzë, Blerim, Qafë Mali e Qelëz skanë ushqime dhe ngrohje. Në Kukës janë të bllokuara akset Krumë-Bajram Curri, Bajram Curri-Qafë Morinë, Kukës-Shishtavec, Kukës-Peshkopi dhe Kukës-Bushtricë. Ndërsa akset Kukës-Krumë, Morinë-Kalimash kalohen me vështirësi vetëm me zinxhirë.
Në Korçë akset Qafa e Qarrit, Korçë-Dardhë dhe Korçë-Voskopojë kalohen me zinxhirë. Ndërsa kamionët nuk lejohen ende të kalojnë në aksin Kapshticë-Kozanë. Komunat e bllokura janë Lekas, Çlirim dhe Velcan.
Në qarkun e Korçës mësohet se është ngritur Shtabi i Emergjencave Civile i shoqëruar me grupet operacionale në rastet e fatkeqësive, pasi trashësia e dëborës në shumë komuna ka bllokuar qindra banorë.
Shkrime të tjera me interes:
- Acari siberian mban të bllokuar Shqipërinë Shqipëria vazhdon të jetë e mbërthyer nga temperaturat e ulëta...
- Akulli izolon 38 komuna, vështirësi kalimi në shumë akse të vendit Tiranë- Për shkak të motit të keq dhe reshjeve të...
- Dëbora mban të bllokuar Shqipërinë Dëbora në vend vazhdon të mbajë të bllokuara akse dhe...