Nis asistenca e CIA’s për kryengritësit

Sipas gazetës amerikane ‘The New York Times’, e cila citon zyrtar amerikan dhe agjentë arabë të sigurimit, pohon se një grup i vogël agjentësh të CIA po operojnë fshehurazi në jug të Turqisë. Ata po iu ndihmojnë aleatëve për të vendosur se cilave grupe të kryengritësve sirianë matanë kufirit duhet t’iu dërgohet armatim.

Armët, përfshirë këtu pushkët automatike, raketat, municionin dhe armatimin anti-tank, po futen në Siri përgjatë gjithë kufirit turk, nëpërmjet një rrjeti të fshehtë të ndërmjetësuesve, në mesin e të cilëve ka grupe të Vëllazërisë Myslimane të Sirisë por edhe turq, sauditë dhe kataras të paguar, pohojnë zyrtarët.

Zyrtarët e CIA ka disa javë që ndodhen në Turqinë jugore, pjesërisht edhe për të ruajtur armët që të mos në duar të grupeve terroriste dhe grupeve aleate të rrjetit Al-Qaeda. Administrata e presidentit Obama ka deklaruar se nuk po i furnizon grupe opozitare siriane me armatim, megjithëse ajo, gjithashtu, ka bërë të ditur se shtete fqinje të Sirisë mund të jenë duke e bërë këtë gjë.

Kjo ndërhyrje e fshehtë e inteligjentes amerikane në armatimin e kryengritësve paraqet asistencën e vetme të dukshme amerikane për fushatën kundër pushtetit në Damask. Po ashtu, kjo mbështetje është pjesë e përpjekjeve të Washingtonit për rritjen e presionit ndaj presidentit Bashar al-Assad, i cili kohëve të fundit ka shtuar sulmet vdekjeprurëse ndaj civilëve dhe milicive që po e kundërshtojnë sundimin e tij. Përkundër bllokimit gjithnjë e më agresiv të Rusisë të hapave kundër pushtetit të Assadit, SHBA dhe aleatët e tyre i janë kthyer diplomacie dhe përpjekjeve q për synim kanë ofrimin e ndihmës për kryengritësit e armatosur, në mënyrë që ta detyrojnë presidentin Asaad që të largohet nga pushteti.

Duke ndihmuar gupet kryengritëse, agjentët e inteligjencës amerikane në Turqi shpresojnë se do të mësojnë më tepër lidhur me rritjen dhe ndryshimin e rrjetit opozitar brenda Sirisë, dhe se do të krijojnë lidhje të reja me ta, shkruan gazeta NYT.

“Agjentët e CIA janë atje, dhe ata po mundohen të sigurojnë burime të reja dhe të rekrutojnë njerëz të rinj” i tha gazetës një zyrtar arab i zbulimit, i cili mban kontakte të rregullta me palën amerikane.

Zyrtarët amerikan dhe agjentë të pensionuar të CIA’s pohojnë edhe se Administrata po ofron një përkrahje shtesë për kryengritësit, siç është furnizimi i tyre me imazhe satelitore dhe detaj të tjera të zbulimit që ndërlidhen me lokacionet dhe lëvizjet e forcave siriane. Gjithashtu, Administrata aktualisht po e shqyrton edhe mundësinë që t’i ndihmojë opozitës siriane në formimin e një shërbimi bazik të zbulimit. Megjithatë, ende nuk është sjellë asnjë vendim lidhur me ndërmarrjen e këtyre masave, apo të hapave tjerë edhe më agresiv, siç është për shembull dërgimi i agjentëve të CIA’s brenda Sirisë, thonë burimet e NYT.