Një 9-vjeçar me grip derri në spitalin e Gjirokastrës

 

GJIROKASTER - Një 9-vjeçar nga Delvina rezulton i prekur nga virusi i gripit të derrit. Përgjigjja e analizave të dërguara në Tiranë, ka vënë në alarm stafin mjekësor infeksionist të spitalit rajonal të Gjirokastrës, ku ishte shtruar fëmija. Ata kanë vendosur menjëherë në karantinë fëmijën, banor i një fshati të Delvinës. Fëmija është shtruar në spital mbrëmjen e së mërkurës, në pritje për të mësuar nëse ishte i infektuar me virusin e rrezikshëm. Sipas mjekëve infeksionistë të spitalit rajonal “Omer Nishani”, fëmija është vendosur në karantinë dhe vizitat e mjekëve tek dhoma ku qëndron ai, kryhen nën kujdes të plotë me maska dhe mjete mbrojtëse. Fëmija është shoqëruar nga prindërit e tij në spitalin e Gjirokastrës, të cilët nuk dihet nëse janë të infektuar apo jo. Burimet spitalore pohojnë se analizat e familjarëve të 9-vjeçarit janë dërguar në Tiranë për t’u identifikuar nëse ndodhen në fazën e parë të infektimit apo jo. Gjendja shëndetësore e fëmijës së shtruar paraqitet normale. “Fëmija aktualisht ka temperaturë konstante trupore, me rrufë dhe dobësi trupore”, pohon një infermiere e pavijonit të infektivit. Deri më tani sëmundja nuk ka përparuar, ndërkohë që nuk janë konstatuar probleme në aparatin respirator, e cila është faza më kritike e agravimit të sëmundjes. Rasti i djeshëm shënon të tretin gjatë 4 muajve të fundit. Në fund të gushtit, u konstatohen me vonesë dy raste me sëmundjen AH1N1 në Gjirokastër tek dy pacientë, të cilët qëndruan në karantinë për shtatë ditë në Spitalin Rajonal të Gjirokastrës.          p.n