Një mashtrues nën hijen e BerishësNga Mero BazePër të disatën herë më duhet të shikoj me keqardhje se si disa stacioneve televizive që bëjnë pasqyrën e shtypit në mëngjes, dhe veçanërisht kolegu Hoxha, iu duhet të fshehin titujt e parë të gazetës “Te

Nëse dëshironi të lexoni edicionin online të gazetës në PDF klikoni këtu.

Për të disatën herë më duhet të shikoj me keqardhje se si disa stacioneve televizive që bëjnë pasqyrën e shtypit në mëngjes, dhe veçanërisht kolegu Hoxha, iu duhet të fshehin titujt e parë të gazetës “TemA”, kur bëhet fjalë për Rezart Taçin. Nuk më shqetëson si qëndrim personal ndaj gazetës, pasi e di që nuk është i tillë. Nuk është as politike, pasi të njëjtat stacione i lexojnë me qejf titujt kundër Berishës apo qeverisë në përgjithësi. Por është e dhimbshme që një biznesmen, nga ata që po ringjallin kohën e piramidave në Shqipëri, është shfaqur dhe po dikton politikën dhe medien prej vitit 2001, kur Ilir Metës i duhej mbijetesa në Kuvend përballë Nanos, e deri sot, kur Sali Berishës i duhet Ilir Meta.

Quhet Rezart Taçi dhe është nga soji i biznesmenëve që janë katapultuar në biznes nga politika dhe tashmë e diktojnë atë. Në një votim të vështirë për Ilir Metën në vitin 2001, ky njeri çoi me makinë në Kuvend vjehrrin e vet, atëherë deputet i Legalitetit, dhe përfitoi me prokurim të drejtpërdrejtë për llogari të një kompanie italiane një kontratë për naftën krudo. Fitimi neto ishte rreth 2 milionë dollarë me një gjest politik. Prej atëherë ai u bë pjesë e pandarë e biznesit politik me naftën. Pas ikjes së Metës vazhdoi me Nanon dhe Berisha e akuzonte se ishte bërë pronar i portit të Shëngjinit. Kohët ndryshuan dhe në vjeshtën e vitit 2005 ky njeri u shfaq sërish në hollet e hoteleve duke kërkuar miq të Sali Berishës. Pas pak kohësh ia arriti. Vajza e kryeministrit e bëri klient dhe gruaja e tij filloi të shfaqej në mbrëmjet e bamirësisë së zonjës Berisha. Mbaj mend se nga fillimi i vitit 2006, Sali Berisha fare papritur më hapi një bisedë për të duke më thënë se e kishte ngatërruar me dikë tjetër këtë Rezart Taçin. Ky i vërteti, sipas Berishës, ishte biznesmen i ndershëm.

Prej atëherë Rezart Taçi vazhdon të jetë dora e djathtë e Berishës në biznesin e naftës. Banka e familjes Berisha u bë garante e një pagese ende të papasqyruar në buxhetin e shtetit për blerjen formale të ARMO-s, ndërsa gruaja e kryeministrit u shfaq në krah të tij për të legjitimuar sjelljen super të shtrenjtë të Milanit në Shqipëri si vepër bamirësie.

Tashmë ky biznesmen i ka miliona euro borxh “Albpetrol”-it, se nuk i ka paguar naftën që merr për ARMO-n, i ka borxh “Bankers”, të cilën po ashtu nuk e ka paguar, ka lënë pa rroga punëtorët e “Albpetrol”-it që s’kanë të ardhura, pasi ua ka marrë naftën pa lekë, u ka borxh tatimeve shqiptare, të cilat e tolerojnë me urdhër të Berishës. Gjatë muajit korrik iu desh të bënte një skenar të tërë mashtrimesh që nga blerja e Bolonjës deri te takimi me Berluskonin që të fuste një vapor me naftë pa doganë dhe ia arriti. Sot nafta e vaporit “Athina” është shkarkuar në depot e tij dhe ai ende s’i ka dhënë asnjë qindarkë shtetit shqiptar. Sapo anija u shkarkua, ai njoftoi që nuk e blen Bolonjën. Pra, miti i njeriut të pasur nuk i interesonte më këtë muaj.

Por në historinë e tij të vitit të fundit ka disa mite të tilla të vetë-krijuara prej tij dhe medias rrogëtare shqiptare. Miliona shqiptarë për shembull e dinë tani se Rezart Taçi ka blerë “Sheraton”-in. Mediet e blera prej tij dhanë lajmin me bujë 9 muaj më parë dhe nuk e sqaruan kurrë që as e ka blerë e as e blen dot. I vetmi që është bërë me dhimbje koke është menaxheri i “Sheraton”-it që ka fyer prestigjin e hotelit me këtë përgojim popullor prej medias shqiptare. Këtë mashtrim e bëri atëherë kur ne po ngrinim dyshimet tona për mospagesën e ARMO-s. Më pas, kur vijuan dyshime të tjera për të, media i doli në krah dhe tha se po blen një bankë arabe. Në fakt bëhet fjalë për një sportel banke te rruga e “Petro Ninit” në Tiranë që s’ka punuar asnjë ditë dhe s’ka as licencë, se ia ka hequr Banka Qendrore. Dhe ky lajm nuk u përgënjeshtrua kurrë. Një ditë pasi gazeta “TemA” publikoi tri javë më parë lajmin se anija e tij po tentonte të shkarkohej pa paguar, shpiku lajmin e Bolonjës. Bëri dhe gjithë lëvizjet e duhura publike ta bënte të besueshme. Besimi jonë te mashtrimet e tij na bindi të shkruanim që atë ditë në gazetë se ky njeri s’do ta blejë dot Bolonjën dhe ja ku përfundoi me një sms halabakësh fundi i kontratës.

Por pavarësisht qartësisë që kemi treguar ndaj këtij sekseri të politikës në biznesin e naftës, ndjehem thellësisht i dëshpëruar, që një pinjoll i ri i Sudes, Xhaferrit, Alimuçës apo të tjerëve të vitit 1996, është rikthyer në skenë me të njëjtin sfond politik. Piramidat u bënë popullore pikërisht pas fushatës së zgjedhjeve të vitit 1996, dhe atëherë Berisha kishte fitore të plagosur, dhe atëherë paraardhësit e Rezart Taçit e mbështesnin fort atë. Madje, Vehbi Alimuça arriti të fuste dhe makinat e VEFA-s në Formula Uno. Media po ashtu u bënte hosanna, dhe populli besonte se Zoti i kishte dërguar ata për t’i shpëtuar. Por Zoti në të vërtetë tregohet i pamëshirshëm me ne në këto raste. Kam frikë se kjo vjeshtë që vjen do të jetë e vështirë për tipa si ky. Dhe pas kësaj kolapsi mund të jetë zinxhir, se ky njeri ka marrë peng shtetin. Ky nuk u ka borxh fshatarëve apo hallexhinjve si Xhaferri. Ky mund të ikë duke marrë me vete shumë buxhete publike që u ka borxhe. Dhe nuk është se i ka bërë keq llogaritë. Ka blerë gjithë medien shqiptare, ka blerë gjithë klasën politike nga e majta tek e djathta, ka blerë familjen në pushtet, por si çdo krim i papërsosur ka hyrë tashmë në gojën e medias italiane me mashtrimin e fundit. Shpresoj që ky të jetë shansi për të ndriçuar një histori qesharake mashtrimi me miliona euro nga xhepat e shqiptarëve që harxhohen për të ndërtuar mitin e suksesit te një biznesmen që nuk është i tillë. Historia e Rezart Taçit është skaneri real i korrupsionit politik dhe kapjes së shtetit në Shqipëri. Suksesi i tij i vetëm deri më sot është blerja e medias shqiptare dhe familjes në pushtet, por kaq nuk mjafton të blesh të shkuarën dhe të ardhmen tënde.