Një vit pa Winehouse

Fituesja e pesë çmimeve Grammy dhe një prej këngëtareve më të talentuara të gjeneratës së re, Amy Winehouse (27), një vit më parë, më 23 korrik 2011, u gjet e vdekur në banesën e saj në Londër.

Pas spekulimeve disajavëshe për shkakun e vdekjes së këngëtares, që disa herë u përball me sëmundjet e shkaktuara nga vartësia ndaj drogës, u konstatua se organizmi i Winehouse nuk kishte mundur të përballojë rikthimin e konsumimit të alkoolit. Para vdekjes, kishte tre vjet që Winehouse ishte “pastruar” nga droga.

Pas vdekjes, babai i saj, Mich, inicioi fondacionin me emrin e saj për t’iu ndihmuar të varurve nga droga, dhe botoi librin “Amy: Vajza Ime”, ku përshkruan jetën me vajzën e tij të talentuar por problematike.

Në dhjetor të viti të kaluar është publikuar albumi post-mortem i saj "Lioness: Hidden Treasures".

Vdekja në moshën 27-vjeçare e Amy Winehouse bëri që ajo të bëhet pjesë e “Klubit 27”, që përbëhet nga muzicientë të njohur që vdiqën me 27 vjet, si Janis Joplin, Jim Morrison, Jimi Hendrix, etj.