Nuk ka vija të kuqe për koalicion qeveritar

Dy ditë pas përfundimit të zgjedhjeve të përgjithshme, Koalicioni për Kosovë të Re ka bërë të ditur se nuk ka vija të kuqe ndaj subjekteve politike për arritjen e koalicionit qeveritar dhe se do të bashkëpunojë me gjithë subjektet që konstituojnë Kuvendin e Kosovës.

Në një komunikatë për media të Koalicionit për Kosovë të Re theksohet se pjesëmarrja në çfarëdo koalicioni tash dhe në të ardhmen, kushtëzohet me hapësirën që ofrohet për të realizuar zotimet e Koalicionit për Kosovë të Re para zgjedhësve.

“Sa i përket krijimit të institucioneve, ne konsiderojmë që sa më shpejt duhet të shihet nëse këto zgjedhje do të certifikohen. Pas kësaj, Kuvendi i Kosovës duhet të konstituohet sa më parë. Koalicioni do të bashkëpunojë me gjithë subjektet që konstituojnë Kuvendin e Kosovës për të gjetur një zgjidhje të përshtatshme që ta nxjerrë vendin nga kriza institucionale dhe e qeverisjes. Për ne mund të jenë të pranueshme edhe alternativa e tjera (qeveria teknike deri në zgjedhje që do të mbaheshin pas një viti apo të ngjashme)”, thuhet në komunikatë.

Koalicioni për Kosovë të Re kërkon që secili akt i shkeljes së ligjit gjatë procesit zgjedhor, të procedohet në mënyrë efektive dhe aktorët e shkeljes së ligjit, të përgjigjen para ligjit.

Koalicioni fton gjithë subjektet politike dhe shoqërinë civile, që menjëherë të fillojnë aktivitetet për tejkalimin e dobësive në sistemin zgjedhor, që të përfundojë regjistrimi i popullsisë, të spastrohen listat zgjedhore, të evidentohen votuesit rezident, votuesit që janë rezident në vendet e tjera dhe listat zgjedhore të azhurnohen rregullisht duke hequr personat e vdekur.

Po ashtu, Koalicioni kërkon që të shqyrtohen mundësitë për digjitalizimin e zgjedhjeve dhe procesit zgjedhor.