OKB: Shqetësim për dëshmitarët në Kosovë

Këshilli për të Drejtat e Njeriut në OKB ka shprehur shqetësimin e tij për mbrojtjen e dëshmitarëve në Kosovë, pas vdekjes së Agim Zogajt, dëshmitar kyç në çështjen “Kleçka”.

“Fakti që motivet e sakta të vetëvrasjes së dyshuar janë të vështira për t`u konstatuar, shton shqetësimet tona në lidhje me mbrojtjen e dëshmitarëve në Kosovë”, ka deklaruar Rupert Colville, zëdhënës i Këshillit për të Drejtat e Njeriut.

Ai ka bërë thirrje për krijimin e një sistemi efektiv dhe të pavarur për mbrojtjen e dëshmitarëve në Kosovë.

“Vetëm një gjë e tillë do të sillte drejtësi për viktimat dhe do t`i jepte. Fakti që motivet e sakta të vetëvrasjes së dyshuar janë të vështira për t`u konstatuar, shton shqetësimet tona në lidhje me mbrojtjen e dëshmitarëve në Kosovë”, ka theksuar Colville.

Agim Zogaj ishte dëshmitari kyc në çështjen “Kleçka”, ku është i përfshirë edhe nënkryetari i PDK-së, Fatmir Limaj, i cili aktualisht ndodhet në arrest shtëpie.

Limaj dhe tetë persona të tjerë, ish-luftëtarë të UÇK-së, akuzohen për krime lufte ndaj robërve dhe popullsisë civile serbe në fshatin Kleckë.

I njohur ndryshe si “Dëshmitari X”, Zogaj u gjet i vdekur mëngjesin e së mërkurës në një park të qytetit të Duisburgut, në Gjermani.

Policia gjermane deklaroi se për momentin dyshohet për një vetëvrasje, pasi nuk ka të dhëna për pista të tjera.