OKB: Zgjedhjet në Afganistan, me manipulime të dukshme

Në zgjedhjet presidenciale të 20 gushtit në Afganistan u vunë re "mashtrime të konsiderueshme". Kështu ka deklaruar nga Kabuli i dërguari special i OKB-së, norvegjezi Kai Eide. "Është e vërtetë se në disa qendra elektorale në jug e juglindje ka pasur një numër të konsiderueshëm mashtrimesh e falsifikimesh, por jo vetëm aty", deklaroi ai në një konferencë për shtyp, pa dhënë më tej detaje për të mos influencuar në rinumërimin e votave që është duke u zhvilluar aktualisht në vend. Eide ka dashur t‘u përgjigjet kështu akuzave, sipas të cilave, ai ishte përpjekur të mbulonte pjesërisht mashtrimet e bëra gjatë numërimit për të favorizuar Presidentin Hamid Karzai, dhe pranoi se "është një proces elektoral i vështirë e me shumë probleme". "Shtrirja e këtyre mashtrimeve është duke u analizuar. Për momentin nuk e dimë me saktësi, por është e rëndësishme të vazhdohet në rrugën për të konsoliduar demokracinë në Afganistan. Kam implementuar mandatin tim me mbështetjen e plotë të komunitetit ndërkombëtar". Në konferencën për shtyp ishin të pranishëm ambasadorët e SHBA-së, Britanisë së Madhe, Francës, përfaqësuesit specialë të BE në Kabul dhe përfaqësuesit civilë të NATO-s. Sipas rezultateve paraprake të zgjedhjeve, Karzai qëndron në krye me 55% të votave kundrejt 28 për qind të rivalit të tij kryesor, ish-ministrit të Jashtëm, Abdullah Abdullah. Rezultatet përfundimtare, pas shqyrtimit dhe analizimit të fletëve të votimit të dyshuara si të manipuluara, duhet të bëhen publike gjatë javës. Komisioni elektoral afgan, i mbështetur nga OKB-ja ka urdhëruar rinumërimin e fletëve në 274 nga 3498 qendra votimi në vend. Eide mohoi të ketë fshehur informacione lidhur me mashtrimet, një akuzë kjo e bërë nga ish-zëdhënësi i tij. Ai tha se OKB-ja, që ka ndihmuar për organizimin e zgjedhjeve, u kishte përcjellë autoriteteve afgane disa informacione relevante për mashtrimet. Debati lidhur me mënyrën se si i menaxhoi zoti Eide këto mashtrime, çoi në dorëheqje brenda misionit. Një prej kandidatëve kryesorë në zgjedhjet presidenciale, Abdullah Abdullah vuri në dyshim neutralitetin e zotit Eide gjatë procesit zgjedhor. Akuzat e ish-zëvendësit të tij, Peter Galbraith, se njoftimet për falsifikime nuk kanë qenë vendimtare për zgjedhjet, kanë "penguar të gjithë procesin zgjedhor", tha Eide në konferencë.