Obama i shkruan Berishës: Presim të vazhdojmë bashkëpunimin

Presidenti i Shteteve të Bashkuara të Amerikës, Barak Obama, i shkruan letër urimi për zgjedhjet e 28 qershorit Kryeministrit Sali Berisha. Kryediplomati amerikan në Tiranë, Xhon Uidhers, zhvilloi dje një takim me kreun e qeverisë shqiptare për t‘i përcjellë mesazhin e urimit. Pas urimeve nga homologët e vendeve fqinje, nga krerët e Europës, ishte radha e Shteteve të Bashkuara të Amerikës për të përshëndetur rizgjedhjen për herë të dytë të Sali Berishës si Kryeministër. Në mesazhin e Presidentit Obama, ndër të tjera thuhet se "Shtetet e Bashkuara të Amerikës vlerësojnë kontributin e Shqipërisë në shtrirjen e paqes e stabilitetit në botë. Mbetem i angazhuar të vazhdoj bashkëpunimin me ju dhe të përkrah aspiratat euroatlantike të vendit tuaj". Më tej Obama shpreh besimin se bashkëpunimi i vazhdueshëm do t ‘i konsolidojë edhe më tej lidhjet midis dy vendeve. Në mesazhin e tij drejtuar Kryeministrit Berisha, Obama shkruan: "I dashur Kryeministër, ju lutem pranoni përgëzimet e mia për rikonfirmimin e mandatit tuaj si Kryeministër i Shqipërisë. Pres me padurim të vazhdoj të punoj së bashku me ju për të promovuar lirinë dhe mirëqenien në të gjithë botën". Presidenti i SHBA-së thotë se për të ka qenë një nder i madh që së bashku me udhëheqësit e tjerë të vendeve të NATO-s të mirëpresin Shqipërinë dhe Kroacinë si anëtarët më të rinj të Aleancës në Samitin e Strasburg-Kehlnit në fillim të këtij viti. "Shtetet e Bashkuara të Amerikës vlerësojnë lart marrëdhëniet e ngushta e miqësore me Shqipërinë. Jam i bindur se bashkëpunimi ynë i vazhdueshëm do t‘i konsolidojë edhe më tej lidhjet midis dy vendeve tona. I uroj qeverisë suaj dhe juve personalisht, sukses të plotë në mandatin e ri qeverisës si Kryeministër", përfundon mesazhi i Presidentit të SHBA-ve, drejtuar Kryeministrit Sali Berisha. Në 10-ditëshin e fundit të shtatorit, kreu i qeverisë shqiptare bashkë me delegacionin e tij zhvilluan një vizitë 8-ditore në Shtetet e Bashkuara të Amerikës, ku morën pjesë gjithashtu në sesionin e 64-të të Asamblesë së Përgjithshme të Organizatës së Kombeve të Bashkuara. Kryeministri Berisha priti dje paradite në takim ambasadorin e Shteteve të Bashkuara të Amerikës në Tiranë, i cili i dorëzoi Kryeministrit Berisha mesazhin e urimit të Presidentit Obama për fitoren në zgjedhjet parlamentare dhe formimin e qeverisë së re. Kabineti qeveritar përcaktoi programin që do të ndjekë në katër vitet në vazhdim dhe ka nisur menjëherë punën, pas dekretimit në Presidencë dhe miratimit në Kuvend.