Obama para Romneyt

Presidenti amerikan, Barack Obama, kryeson në anketat e opinionit publik me një epërsi prej katër pikë ndaj rivalit të tij republikan, Mitt Romney.

Sipas hulumtimit më të ri, të bërë nga NBC, Obamën po të mbaheshin zgjedhjet sot, do ta votonin 47 për qind e të anketuarve, ndërsa Romneyn 43 për qind.

Edhe përkundër faktit se Obama kryeson ende, epërsia e tij është shkrirë në krahasim me anketën e bërë në prill, në të cilën Obama u mbështet nga 49 për qind e të anketuarve, ndërsa Romney nga 43 për qind.

Obama kryeson bindshëm ndaj Romneyt në mesin e votuesve me ngjyrë, e gjithashtu mbështetet më tepër edhe nga votuesit prej moshës 18 deri 35 vjeç.

Gjithashtu, ai ka një epërsi të dukshme edhe në mesin e femrave dhe në mesin e votuesve, të cilët thonë se nuk janë pjesëtarë të asnjë partie.

Në anën tjetër, Romney kryeson në mesin e votuesve të bardhë, si dhe në mesin e votuesve me ardhura më të mëdha.