Obot, aty ky mjeket "sherojne" me gomone
Sonila Isaku
Nje telefonate e detyron mjekun e qendres shendetesore te Oblikes, te lere punen dhe te kerkoje ndihmen e forcave te rendit, per te shkuar ne mes te ujit aty ku ka shtepi me banore. Nje grua e moshes 80-vjecare, ndodhet ne gjendje te rende shendetesore per shkak te nje astme te theksuar, por edhe te problemeve me hipertensionin. Rastin e Roza Gjocit, 80-vjecares nga Oboti, mjeku i qendres shendetesore Ilir Laci, e njihte shume mire, ndaj nuk nguroi per asnje moment te nisej drejt Obotit. Ndersa pershkoi nje pjese te rruges me makine, mjeku Laci i kerkoi ndihme forcave policore te cilet duhet te benin zhvendosjen e tij me gomone, per ne familjen Gjocaj ku ndodhej edhe pacientja e semure. Ndersa pershkon rrugen per ne fshatin Obot, gomonia e policise ka marre me vete edhe disa banore te fshatrave te tjera te komunes se Rrezes se Malit, te cilet kerkojne te shkojne prane banesave te tyre. Nderkohe mjeku tregon per gazeten "Koha Jone", se kjo rruge ndiqet gjithmone sa here qe paraqiten raste te cilat kane nevoje per mjekim. "Kete itinerar qe po ndjekim bashke, une e bej cdo moment, kur pacientet e mi me kerkojne ndihme. Disa prej banoreve te cilet jane ne zonat e permbytura, por qe uji ende nuk ka hyre ne shtepite e tyre, jane te semure kronike te cilet kerkojne ndihme mjekesore" ka pohuar mjeku i poliklinikes se Oblikes, Ilir Laci. Sipas tij, te semuret kronike per shkak te situates se krijuar nga permbytjet shpesh here harrojne te pine medikamentet dhe kjo iu sjell probleme shendetesore.
E ndersa udhetojme me mjekun Ilir Laci drejt Obotit me nje gomone te policise, duket sikur je mbi det, vetem uje. Tet-tuk shikon ndonje peme, se ciles i kane mbetur ne ajer vetem majat e degeve, apo ndonje shtepi nga e cila mund te shquash catine dhe nje pjese te katit te pare. Banoret e zones tregojne se fshati Obot, duke qene nje nder zonat me te permbytura i ka banesat, apo katet e banuara mbi 1.5 meter nga toka. Banesat e ketij fshati jane ndertime te koheve te fundit, ndertime te cilat kane marre shume investime, ndersa sot... ndodhen te zhytura ne uje. Mjeku Laci tregon banesen ne te cilen ndodhet pacientja e tij, nje rrugice ne te cilen ne kohe normale mund te kalosh me makine, sot aty kalohet vetem me gomone. Edhe porta e shtepise se familjes Gjoci eshte pothuajse e mbuluar nga uji. "Kjo situate ndodhet ne te gjithe fshatin, por ata qe kane banesa te larta nuk jane evakuuar dhe kane mundur te krijojne kushte per te mbijetuar per keto dite", pohon drejtori i Drejtorise se ISKSH-se ne Shkoder, Millan Janko. Nderkohe, gomonia "parkohet" ne oborrin e shtepise, dhe nga aty mund te kalosh vetem ne ballkonin e baneses. Mjeku Laci merr te gjitha masat per banoren e semure, e cila paraqet nje gjendje te rende shendetesore per shkak te astmes. E ndersa le te gjitha porosite per familjaret se si duhet te behet mjekimi, dhenia e medikamenteve etj, mjeku Laci i hipen perseri gomones per te shkuar ne qendren shendetesore, per te pritur nje tjeter pacient, apo per te bere udhetimin e radhes, per te shpetuar nje jete ne mes te ujit.