PARIS – Samiti për sigurinë e IA-së mbledh liderët botërorë ‘të etur’ për masa më të lehta
PARIS, 2 shkurt /ATSH/- Udhëheqësit botërorë dhe drejtuesit e teknologjisë u mblodhën dje në Paris për të diskutuar se si të përvetësohet siguria e inteligjencës artificiale në një kohë të rezistencës në rritje ndaj burokracisë që bizneset thonë se po mbyt inovacionin, sipas “Reuters”.
Dëshira për të frenuar IA-në është zbehur që nga samitet e mëparshme në Britani të Madhe dhe Korenë e Jugut që përqendruan vëmendjen e fuqive botërore në rreziqet e teknologjisë pas lançimit viral të ChatGPT në 2022.
Ndërsa presidenti i SHBA-së, Donald Trump, ka refuzuar barrierat e sigurisë së inteligjencës artificiale të paraardhësit të tij për të promovuar konkurrencën e SHBA-së, presioni është rritu mbi Bashkimin Evropian për të ndjekur një qasje më të lehtë ndaj IA-së për të ndihmuar në mbajtjen e kompanive evropiane në garën e teknologjisë.
“Nëse duam rritje, vende pune dhe progres, ne duhet të lejojmë inovatorët të inovojnë, ndërtuesit të ndërtojnë dhe zhvilluesit të zhvillohen”, tha CEO i “OpenAI” Sam Altman në një artikull në gazetën “Le Monde” përpara samitit.
Disa liderë të BE-së, duke përfshirë pritësin e samitit, presidentin francez Emmanuel Macron, gjithashtu shpreson se fleksibiliteti do të zbatohet në Aktin e ri të IA-së së bllokut për të ndihmuar bizneset fillestare.
“Ka një rrezik që disa vendosin të mos kenë rregulla dhe kjo është e rrezikshme. Por ekziston edhe rreziku i kundërt, nëse Evropa vendos shumë rregulla”, u tha Macron gazetave rajonale franceze.
“Ne nuk duhet të kemi frikë nga inovacioni”, shtoi ai.
Masat e hershme të Trump në lidhje me IA-në nënvizuan se sa shumë kanë ndryshuar strategjitë për të rregulluar inteligjencën artificiale në SHBA, Kinë dhe BE.
Ligjvënësit evropianë miratuan vitin e kaluar Aktin e IA-së së bllokut, grupi i parë gjithëpërfshirës në botë i rregullave që rregullojnë teknologjinë. Gjigantët e teknologjisë dhe disa kryeqytete po bëjnë presion që ai të zbatohet me butësi.
Ndërkohë, “DeepSeek” i Kinës sfidoi lidershipin e IA-së së Shteteve të Bashkuara të Amerikës, muajin e kaluar duke shpërndarë lirshëm një sistem arsyetimi të ngjashëm me njeriun, duke nxitur rivalët gjeopolitikë dhe të industrisë që të garojnë më shpejt. //a.i/